مقام پر پہنچنے کے بعد لاعلمی میں تیمم سے پڑھی ہوئی نماز کا حکم

السلام علیکم! رہنمائی درکار ہے، ایک شخص نے گاڑی موٹروے پرخراب ہونے کی وجہ سے پانی کی عدم دستیابی پر تیمم کرکے نمازِ ظہر ادا کرلی ، کیونکہ نماز قضا ہورہی تھی ، جب وہ بندہ عصر کے وقت اپنے مقام پر پہنچ گیا ، تو اسے یہ بات بھول گئی کہ اس نے تیمم کرکے ظہر ادا کی تھی ، اور اس نےعصر اور مغرب بھی اسی حالت میں ادا کرلی ، جبکہ نمازِ عشاء کے لیے وضو کیا ، اور نمازِ عشاء معمول کے مطابق ادا کی ، بعدمیں جب اُسےیاد آیا کہ اس نے دو نمازیں اسی تیمم سے ادا کی ہیں ، اب کیا وہ ان دو نمازوں کی قضا کرے گا؟ اور اللہ کے نزدیک گناہ گار تو نہیں قرار پائے گا نمازیں بغیر وضو ادا کرنے پر؟

الجوابُ حامِدا ًو مُصلیِّا ً

صورتِ مسئولہ میں مذکور شخص نے اگر کسی سے پانی کے متعلق معلوم کرنے اور علاقائی صورتِ حال دیکھ کر ایک میل کے اندر اندر پانی کی عدم موجودگی کا مکمل یقین اور اطمینان ہونے کے بعد تیمم کر کے نماز ادا کرلی ہو تو اس کی ظہر کی نماز شرعاً درست ادا ہوچکی ہے ، تاہم مقام پر پہنچنے کے بعد پانی کی موجودگی اور اس کے استعمال پر قدرت حاصل ہونے کے بعد چونکہ مذکور شخص کا تیمم باطل ہو چکا تھا ، اس لئے اس پر وضو بنا کر نماز کی ادائیگی لازم تھی ، جبکہ اس کا سابقہ تیمم سے حاصل کردہ طہارت سے مقام پر عصر اور مغرب کی نماز پڑھنے سے یہ نمازیں شرعاً درست ادا نہیں ہوئی ، لہٰذا شخصِ مذکور پر ان دو نمازوں کا اعادہ کرنا لازم ہے ، البتہ اس بھول چوک پر امید ہے کہ وہ گناہ گار بھی نہ ہوگا ۔

مأخَذُ الفَتوی

کما فی المستدرک علی الصحیحین: عن ابن عباس رضی اللہ عنہ قال : قال رسول اللہ ﷺ : ( تجاوز اللہ عن امتی الخطاء،و النسیان، وما استکرھو علیہ ) اھ ( کتاب الطلاق، ج 3 صــــــ 653 رقم الحدیث : 2838 ط : دار الرسالۃ ) ۔
کما فی الھندیۃ: و لو مر بالماء وھو متیمم لکنہ نسی انہ متیمم ینقض تیممہ الخ ( الفصل الثانی فیما ینقض التیمم ج 1 صــــ 29 ط : ماجدیہ ) ۔
وفی الفتاوی التاترخانیۃ: و اذا غلب علی ظن المسافر ان یقربہ ماء لو طلبہ وجدہ او اخبر بہ وجب علیہ الطلب بالاجماع ، و انما الخلاف فیما اذا لم یغلب علی ظنہ ذلک او لم یخبر بہ ( الی قولہ ) و اذا تیمم المسافر و الماء منہ قریب و ھو لا یعلم بہ اجزاء تیممہ ، فان کان عالماً بالماء لم یجز لہ التیمم ، وان کان الماء بعیداً عنہ جاز لہ التیمم و ان کان عالماً بہ الخ (الفصل فی التیمم ج 1 صـــ 367 ط : رشیدیہ)۔