کیا پاکستان دار الاسلام ہے ؟

کیا فرماتے ہیں علماءِ کرام اس مسئلہ کے بارے میں کہ بعض لوگ کہتے ہیں کہ پاکستان میں اسلامی قانون نہ ہونے کی وجہ سے عبادات قابلِ قبول نہیں ہیں اور یہاں کے لوگ عملاً فاسق ، فاجر ، اور کافر ہیں ، وہ لوگ بطورِ دلیل قرآنِ کریم کی آیت ’’و من لم یحکم بما أنزل اللہ فأولٰئک ھم الکافرون/ فاسقون/ ظالمون‘‘ کو پیش کرتے ہیں ، کیا یہ آیتیں اپنے ظاہر پر ہیں یا اس کے کوئی اور معنیٰ ہیں ؟ کیونکہ وہ لوگ ان آیتوں کو اپنے ظاہر پر پیش کرتے ہیں، پاکستان کو دارالکفر اور دارالحرب حکماً تصور کرتے ہیں ،کیا یہ حقیقۃً دارالحرب اور دارالکفر ہیں یا نہیں؟ قرآن و حدیث سے دلیل دے کر جواب عنایت فرمائیں۔

الجوابُ حامِدا ًو مُصلیِّا ً

اتنی بات تو بلاشبہ درست ہے کہ پاکستان میں مکمل طور پر نفاذِ حکومتِ اسلامیہ کی سعی کرنی چاہیے اور پاکستان کی کئی جماعتیں ایسی ہیں جو اپنے قیام کے روزِ اوّل سے ہی اس سعی میں مشغول ہیں، مگر سعی کامیاب نہ ہونے کی وجہ سے تمام مسلمانوں کی تفسیق و تکفیر کرنا اور اس ملک کو دارالکفر یا دارالحرب تک قرار دینا اور اس میں عبادات کے نا قابلِ قبول ہونےکاحکم لگا دینا غلو اور حد سے تجاوز ہے ، جو قرآن و سنت سے پوری طرح واقف نہ ہونے کی دلیل ہے ، انہیں چاہیے کہ اس قسم کی باتوں سے گریز کریں اور اعتدال کیساتھ اپنے مقصد کے لیے کوشش کریں۔
اور جہاں تک سوال میں مذکور آیات کی تفسیر کا تعلق ہے تو اس سلسلہ میں عرض ہے کہ تفسیرِ قرطبی جلد نمبر۲ صفحہ ۱۹۰ کا بغور مطالعہ کریں تو ان آیات سے جو کچھ مراد ہے ،ان شاء اللہ بخوبی معلوم ہو جائیگا۔ واللہ أعلم بالصواب