’’حضورؐ تمہارے مردوں میں سے کسی کے باپ نہیں‘‘ کا مطلب

’’جعلی نبی کی اصلی کہانی‘‘ صفحہ نمبر۷ پر لکھاہواہے ’’حضرت محمدﷺ تمہارے مردوں میں سے کسی کے باپ نہیں، لیکن آپ اللہ کے رسول اور تمام نبیوں کے ختم کرنے والے ہیں‘‘، مہربانی کرکے جواب عنایت فرمائیں کہ حضرت محمدﷺ ہمارے روحانی باپ ہیں اور حضرت عائشہؓ تمام مسلمانوں کی روحانی ماں ہیں، اوپر حوالے کی تشریح بیان کریں۔ شکریہ!

الجوابُ حامِدا ًو مُصلیِّا ً

قرآنِ کریم میں جس طرح مذکور بات کی نفی کی گئی، اس کے ساتھ یہ صراحت بھی کی گئی ’’وأزواجه أمهاتهم‘‘ کہ ازواجِ مطہرات مسلمانوں کی مائیں ہیں اور صحیح روایات میں یہ صراحت بھی ملتی ہے ’’وهو أب لهم‘‘ کہ حضورﷺ ان کے باپ ہیں، قرآنِ کریم کی مذکور صریح نفی کے بعد یہ واضح ہوجاتاہے کہ نبی اکرمﷺ کا امت کے لیے باپ اور آپ کی ازواج کا ماں ہونا روحانی ہے، نہ کہ نسبی اور حقیقی جسمانی، جبکہ آیتِ شریفہ میں نسبی باپ ہونے کی نفی کی گئی ہے۔

مأخَذُ الفَتوی

ففي التفسیر المظھري: تحت قوله تعالی: ﴿ما كان محمد صلى الله عليه وسلم أبا أحد من رجالكم ولکن رسول اللہ﴾ الآية، وكل رسول اب لامته لكن لا من حيث النسب حتى يحرم عليه ما يحرم بالنسب بل من حيث الشفقة والنصيحة اھ (۷/۳۵۰)۔
وفیه ایضا: وٲزواجه ٲمھاتھم، الآية: ﴿في تعظیم حقھن﴾ وتحریم نکاحھن علی التأبید اھ (۷/۲۸۶)۔
وفي تفسیر ابن کثیر: وقوله: ﴿وأزواجه أمهاتهم﴾ أي: في الحرمة والاحترام، والإكرام والتوقير والإعظام (ٳلی قوله) وقدروی عن کعب وابن عباس رضی اللہ عنهما أنهما قرآ (النبی أولی بالمؤمنین من أنفسهم وأزاوجہ أمهاتهم وهو أب لهم) (ٳلی قوله) عن أبي هريرة قال: قال رسول الله صلى الله عليه وسلم: "إنما أنا لكم بمنزلة الوالد أعلمكم" اھ (۳/۶۱۳) واللہ أعلم بالصواب!