’’قد جاءکم من اللہ نور ‘‘سے آپﷺ کونور سے ثابت کرنا

مجھے میری ایک کلاس فیلو جو بریلوی فقہ سے تعلق رکھتے ہیں، نے ایک تقریر بھیج دی ہے، جس میں نبیﷺ کو ’’نور اور بشر‘‘ ثابت کیاہے قرآن کی آیت سے، وہ آیت میں ’’رومن‘‘ میں لکھ رہاہوں اللہ مجھے معاف فرمائے۔ آمین!
’’قد جاءکم من اللہ نور وّکتابٌ مبین‘‘ تو مہربانی فرماکر اس بارے میں سمجھائیں کہ ہمارے نزدیک کیا عقیدہ ہے؟ میں نے شروع سے یہی سناہے کہ بریلوی حضرات کا عقیدہ صحیح نہیں۔ مہربانی فرماکر اصلاح فرمائیں۔

الجوابُ حامِدا ًو مُصلیِّا ً

آنحضرتﷺ اپنی ذات کے لحاظ سے نہ صرف نوع بشر میں داخل ہیں، بلکہ افضل البشر ہیں، نہ صرف انسان ہیں بلکہ نوعِ انسانوں کے سردار ہیں، نہ صرف حضرت آدم علیہ السلام کی نسل سے ہیں بلکہ آدم علیہ السلام اور اولادِ آدم علیہ السلام کیلیے سرمایہ صدِّافتخار ہیں۔ جس طرح آپﷺ اپنی نوع کے اعتبار سے بشر ہیں، اسی طرح آپﷺ صفتِ ہدایت کے لحاظ سے ساری انسانیت کیلیے مینارۂ نور ہیں، یہی وہ ’’نور‘‘ ہے جس کی روشنی میں انسانیت کو خدا تعالیٰ کا راستہ مل سکتاہے، لہٰذا آپﷺ بیک وقت نور بھی ہیں اور بشر بھی ان میں سے ایک کی نفی اور دوسرے کا اثبات قطعاً غلط ہے اور اس کو جھگڑے نزاع کی بنیاد بنا دینا بہت بڑا دھوکہ ہے۔ (ماخوذ اختلاف امت اور صراطِ مستقیم)

مأخَذُ الفَتوی

قال اللہ تعالی: قُلْ إِنَّمَا أَنَا بَشَرٌ مِثْلُكُمْ يُوحَى إِلَيَّ أَنَّمَا إِلَهُكُمْ إِلَهٌ وَاحِدٌ فَمَنْ كَانَ يَرْجُو لِقَاءَ رَبِّهِ فَلْيَعْمَلْ عَمَلًا صَالِحًا وَلَا يُشْرِكْ بِعِبَادَةِ رَبِّهِ أَحَدًا ۔ (الکھف:۱۱۰)۔
وقال تعالی: قُلْ سُبْحَانَ رَبِّي هَلْ كُنْتُ إِلَّا بَشَرًا رَسُولً ۔ الآیۃ (الٳسراء:۹۳)۔
وفی صحیح البخاري: عن علقمة، قال: قال عبد الله صلى النبي صلى الله عليه وسلم ۔(ٳلی قولہ) قال: «إنه لو حدث في الصلاة شيء لنبأتكم به، ولكن إنما أنا بشر مثلكم، أنسى كما تنسون، فإذا نسيت فذكروني، الحدیث (۱/۵۸) واللہ أعلم بالصواب!