سورۃ مائدہ کی آیت نمبر ۴۴ اور ۶۳ میں ’’احبار‘‘ اور ربانییون‘‘ سے کیا مراد ہے؟

کیا فرماتے ہیں علماءِ کرام اس مسئلہ کے بارے میں کہ سورۃ المائدۃ آیت نمبر۴۴ اور آیت نمبر۶۳ کی وضاحت کریں، جس میں احبار، ربانی کا ذکر ہے، احبار اور ربانی سے کیا مراد ہے؟ براہ ِکرم ان تمام آیتوں کی قرآن و سنت کی روشنی میں تشریح و وضاحت فرما دیں۔

الجوابُ حامِدا ًو مُصلیِّا ً

واضح ہو کہ’’ احبار‘‘ حِبْر کی جمع ہے جس کا معنیٰ عالم اور نیک شخص کے ہوتے ہیں، جبکہ ’’ربّانی‘‘ بمعنی شیخ و مرشد اور عالم کے بھی آتا ہے، یہود کی اصطلاح اور محاورہ میں عالم کو حبر کہا جاتا تھا ، اس لیے یہاں ان الفاظ کو ذکر کیا گیا۔
ان آیات میں نزولِ قرآن کے دور کے یہودیوں کو مخاطب کر کے اُن کی کجی اور اس کے انجامِ بد پر تنبیہ کی گئی ہے کہ تمہیں تو چاہیے تھا کہ اپنے اسلاف کے نقشِ قدم پر چل کر تورات کی حفاظت کرتے ، آپ نے اس کے بجائے اس کے احکامات میں تحریف اور تغیّر و تبدّل کر دیا ا ور یہ کہ تورات میں بڑی تفصیل اور وضاحت کے ساتھ نبی آخرالزمانﷺ کے آنے کی خبر اور یہود کو اُن پر ایمان لانے کی ہدایت کی گئی تھی، مگر آپ لوگوں نے ان احکام کی نہ صرف خلاف ورزی کی، بلکہ آپ علیہ السلام کی مخالفت بھی شروع کردی، اسی طرح ان آیاتِ مبارکہ میں ان کی اس مہلک غلطی کا سبب بھی بیان فرما دیا، کہ تم لوگ حبِ مال اور حبِ جاہ میں مبتلا ہونے کی وجہ سے یہ سمجھتے ہو کہ تمہاری چودہراہٹ ختم ہو کر ایک عام فرد مسلم کی حیثیت ہو جائیگی۔ نیز انہیں یہ بھی تنبیہ کی گئی ہے کہ تم لوگوں سے نہ ڈرو کہ وہ تمہارا اتباع چھوڑ دیں گے یا مخالف ہوجائیں گے۔ اور تم دنیا کی متاعِ قلیل لےکر ان کے لیے احکامِ الٰہی میں گڑبڑ نہ کرو کہ یہ تمہارے لیے دین اور دنیا کی بربادی ہے، چنانچہ اس سلسلہ میں اگر مزید تفصیل مطلوب ہو تو کتبِ تفسیر کا مطالعہ کیا جاسکتا ہے۔

مأخَذُ الفَتوی

و فی تفسير القرطبي: وقال أبو رزين: الربانيون العلماء الحكماء والأحبار. قال ابن عباس: هم الفقهاء: والحبر والحبر الرجل العالم وهو مأخوذ من الحبير وهو التحسين، فهم يحبرون العلم أي يبينونه ويزينونه اھ(۶/۱۱۲)-
وفی تفسير ابن كثير: ﴿وَالرَّبَّانِيُّونَ وَالأحْبَارُ﴾ أَيْ: وَكَذَلِكَ الرَّبَّانِيُّونَ مِنْهُمْ وَهُمُ الْعِبَادُ الْعُلَمَاءُ، وَالْأَحْبَارُ وَهُمُ الْعُلَمَاءُ(3/ 117)-