ہاروت و ماورت نامی فرشتوں کو اللہ نے مخصوص کام کیلئے زمین پر مبعوث فرمایا

کیا فرماتے ہیں علمائے کرام ہاروت و ماروت کے بارے میں؟ تفصیل سے بیان کریں آزمائش کے اسباب پر بھی روشنی ڈالیں؟ شکریہ!

الجوابُ حامِدا ًو مُصلیِّا ً

الجواب حامدًا ومصلّیا:
واضح ہو کہ ہاروت اورماروت ان دو فرشتوں کے نام ہیں جنہیں اﷲ تعالیٰ نے بابل شہر میں اس وقت مبعوث فرمایا تھا جبکہ عام لوگوں میں عموماً اور وہاں کے باشندوں میں خصوصاً معجزۂ رسول اور جادو میں اختلاط اور اشتباہ پیدا ہوگیا تھا، کیونکہ وہاں کے لوگوں کیلئے معجزہ اور جادو کی حقیقت میں فرق کرنا نہ صرف مشتبہ بلکہ دشوار ہوچکا تھا۔
چنانچہ اﷲ رب العزت نے عام لوگوں کو ایک تو اس آزمائش سے نکالنے اور جادو کی حقیقت واقسام سے مطلع کرنے کیلئے ہاروت و ماروت نامی فرشتے مبعوث فرمائے جنہوں نے لوگوں کے سامنے جادو کے اصول و فروع بیان کرنے کے ساتھ اس کے عمل بد سے بچنے کی تاکید بھی کی جب بعض لوگوں کے سامنے اس کی حقیقت واضح ہوگئی تو اس کے بعد وقتاً فوقتاً مختلف لوگوں کی آمد و رفت شروع ہوگئی جادو کے اصول و فروع سیکھنے اور اس کی حقیقت واقسام سے مطلع ہونے کی درخواستیں کرنے لگے کہ کہیں ایسا نہ ہو کہ ہم ناواقفی سے کسی اعتقادی یا عملی فساد میں مبتلا ہوجائیں، اور دوسرا اس کے سیکھنے میں بھی ان کی آزمائش تھی کہ ان چیزوں پر مطلع ہونے کے بعد کون شخص اپنے دین کی حفاظت واصلاح کی فکر کرتا ہے اور کون اپنے دین کی خرابی اور بربادی کی راہ اختیار کرتا ہے۔
آپ کے سوال کا مختصرا جواب لکھ دیا گیا اگر مزید تفصیل مطلوب ہو تو اس آیۃ کریمہ {وَاتَّبَعُوْا مَا تَتْلُوا الشَّیَاطِیْنُ عَلٰی مُلْکِ سُلَیْمٰنِ} (الآیۃ)کے تحت تفسیر معارف القرآن، تفسیر مظہری، اور تفسیر روح المعانی وغیرہ کا مطالعہ فرمائیں۔ واﷲ اعلم!