معوّذتین کے شانِ نزول(نبی ﷺ پر جادو)کےمنکر کا حکم

ایک شخص معوذتین کے شانِ نزول (یعنی لبید ابن اعصم اور اس کی بیٹیوں نے مل کر نبی کریم ﷺ پر جادو کردیا تھا، جس کی وجہ سے نبی کریم ﷺ کو اکثر دنیاوی امور میں بھول ہو جایا کرتی تھی) کا منکر ہے اور کہتا ہے کہ اگر اس کو شانِ نزول مانیں تو نبی کریم ﷺ کی تنقیص ہوتی ہے، کہ یہودی نبی اکرم ﷺ پر غالب ہوگئے اور آپ ﷺ مغلوب ہوگئے، اس لیے میں اس کو نہیں مانتا، حالانکہ معوذتین کے اس شانِ نزول کے اوپر تقریباً اجماع ہے تو اس اجماعی مسئلہ کے منکر کو ہم کیا کہہ سکتے ہیں؟فاسق ، فاجر، بدعتی وغیرہ؟ اور اس کا یہ کہنا کہ تنقیص لازم آتی ہے ، کہاں تک صحیح ہے؟ کیا نبی اکرم ﷺ پر اس جادو کا اثر ہوا تھا ؟ نیز شخصِ مذکور اس نزول کے ماننے والے کو کافر کہتا ہے۔

الجوابُ حامِدا ًو مُصلیِّا ً

سحر در حقیقت اسبابِ طبیعیہ ہی کا اثر ہوتا ہے اور انبیاءِ کرام علیہم السلام اسبابِ طبیعیہ کے اثرات سے متاثر ہوتے ہیں ، یہ تأثر شانِ نبوت کے خلاف نہیں ، جیسے ان کا بھوک پیاس سے متأثر ہونا ، بیماری میں مبتلا ہونا اور شفا پانا ظاہری اسباب سے ، سب جانتے ہیں ، اس طرح جادو کے باطنی اسباب سے بھی انبیاءِ کرام علیہم السلام متاثر ہوسکتے ہیں، اور یہ تأثر شانِ نبوت کے منافی نہیں ، رسول اللہ ﷺ پر یہودیوں کا سحر کرنا اوراس کی وجہ سے آپ ﷺ پر بعض آ ثار کا ظاہر ہونا اور بذریعہ وحی اس جادو کا پتہ لگنا اور اس کا ازالہ کرنا احادیثِ صحیحہ سے ثابت ہے اور حضرت موسیٰ علیہ السلام کا سحرسے متاثر ہونا خود قرآن سے ثابت ہے"ویخیل الیہ من سحر ھم انھا تسعی" اور "و اوجس فی نفسہ خیفۃ موسیٰ" موسیٰ علیہ السلام پر خوف طاری ہونا اسی جادو ہی کا تو اثر تھا (معارف القرآن ۱/۲۷۸)۔
اس کے بعد واضح ہو کہ معوذتین کا مذکور شانِ نزول احادیثِ صحیحہ سے ثابت ہے ، اس کا منکر شرعاً فاسق و بدعتی ہے، تا ہم شخصِ مذکور کو کافر نہیں کہا جاسکتا، لہٰذا اسے چاہیے کہ اپنے مذکور خیالات سے مکمل احتراز کرے۔

مأخَذُ الفَتوی

فی صحیح البخاری : عن عائشة رضی اللہ عنہا قالت : سحر رسول اللہ صلی اللہ علیه و سلم حتی انه لیخیل إلیه فعل الشئ و ما فعله الخ(۲/۸۵۸،و فی صحیح مسلم:۲/۲۲۱)۔
و فی مرقاة المفاتیح : قال النووی : قد انکر بعض المبتدعة ھذا الحدیث و زعم انه یحط من منزل النبوة لذلك ، و ان تجویزہ یمنع الثقة بالشرع ، و ھذا الذی ادعاہ باطل لان الدلائل القطعية قد قامت علی صدقه و عصمته فیما یتعلق بالتبلیغ ، و المعجزة شاھدة بذلك و تجویز ماقام الدلیل بخلافه باطل( ۱۰/۲۱۶)۔