پراپرٹی خریدے جانے کے بعد اس کی رقم میں اضافہ کا مطالبہ کرنا

میں نے قسطوں پر ایک پراپرٹی خریدنے کے لئے کیپٹل سمارٹ سٹی سے معاہدہ کیا اور وقت پر تمام اقساط ادا کردیں، قسطیں جمع کروانے کے تقریباً ایک سال گزرنے کے بعد کیپٹل سمارٹ سٹی والوں نے مجھے ایک پیغام بھیجا کہ مہنگائی کی شرح کے حساب سے آپ کی ادائیگی میں تقریباً 80 فیصد اضافہ کردیا گیا ہے، سوال یہ ہے کہ کیا پوری ادائیگی کے بعد اس طرح کے اضافے کا مطالبہ شرعاً میں جائز ہے؟

الجوابُ حامِدا ًو مُصلیِّا ً

واضح ہو کہ کسی چیز کو قسطوں میں خریدوفروخت کا معاملہ کرتے وقت جو قیمت طے ہوجائے،تو خریدار کے ذمہ شرعاً وہی قیمت ادا کرنا لازم ہوتی ہے،بعد میں قیمتوں کے اتار چڑھاؤ کی وجہ سے طے شدہ قمت میں کمی بیشی کا مطالبہ کرنا درست نہیں،لہذا صورتِ مسئولہ میں سائل نے کیپٹل سمارٹ سٹی سے قسطوں پر پراپرٹی جس قیمت پر خریدی تھی،سائل کے ذمّہ شرعاً اتنی ہی رقم ادا کرنا لازم ہے،چنانچہ کیپٹل سمارٹ سٹی والوں کو مہنگائی کی شرح کو بنیاد بنا کر سائل سے طے شدہ قیمت کے علاوہ مزید پیسوں کا مطالبہ کرنا شرعاً جائز نہیں،جس سے اجتناب لازم ہے۔

مأخَذُ الفَتوی

کما فی درر الاحکام شرح مجلۃ الاحکام: حكم البيع المنعقد الملكية يعني صيرورة المشتري مالكا للمبيع والبائع مالكا للثمن ( الی قولہ ) أي أن ملكية المبيع تنتقل للمشتري , وملكية الثمن تنتقل للبائع(الی قولہ) أما الحكم التابع للبيع المنعقد . أولا : وجوب تسليم البائع للمبيع إلى المشتري . ثانيا : دفع المشتري الثمن للبائع الخ (الکتاب الاول البیوع، الباب السابع ، الفصل الثانی،المادۃ369،ج 1،ص 333،ط:الکتب العلمیۃ)۔
و فیہ ایضاً:فالبيع الصحيح يفيد الملكية حتى قبل القبض راجع المادتين أي بمجرد حصول هذا البيع يصبح المشتري مالكا للمبيع كما أن البائع يصبح مالكا للثمن ولو لم يحصل القبض الخ(الکتاب الاول البیوع،المادۃ،106، ج 1،ص 93،ط:الکتب العلمیۃ)۔