خریدوفروخت کا معاہدہ ہونے کے بعد پلاٹ نہ بیچنے کی صورت میں بیعانہ ڈبل لینا

کیا فرماتے ہیں علماءِ کرام ومفتیانِ عظام اس مسئلہ کے بارے میں کہ میں محمد نواز ولد بہادرخان ساکن بحریہ کواپریٹو ہاؤسنگ سوسائٹی (منول کالونی) حب ریور روڈ کراچی نے دو سال قبل اپنے ایک دوست بحریہ ملازم حمید خان ولد علی حیدر کے ساتھ ملکر ایک پلاٹ (8,60۰۰0) آٹھ لاکھ ساٹھ ہزار میں خریدا، نیت یہ تھی کہ جب اس کی قیمت بڑھ جائے گی تو فروخت کر کے نفع حاصل کریں گے ۔ اب دو سال بعد جب اس کی قیمت بیس لاکھ کے قریب پہنچ چکی تو ہم نے باہمی مشورہ سے یہ فیصلہ کیا کہ اب اس کو فروخت کر دیتے ہیں ، طے یہ ہوا کہ اگر بیس لاکھ سے اوپر اس کی قیمت لگی تو فروخت کر دیں گے، چنانچہ میرے پاس ایک پارٹی آئی جس نے 50000 ،20 بیس لاکھ پچاس ہزار روپے کی آفر کی تو میں نے حمید خان کو فون کر کے بتایا تو وہ بہت خوش ہوا اور کہنے لگا کہ ماشاء اللہ بہت اچھی قیمت لگی ہے، آپ اس کو فروخت کر دیں ، چنانچہ میں نے معاملہ طے کر لیا ، اور دو لاکھ روپے بیعانہ بھی وصول کر لیا ، اس کے بعد جب ہم حمید خان کے پاس کاغذات لینے گئے تو اس نے صاف انکار کر دیا اور کہا کہ میں تو اپنا حصہ فروخت نہیں کرونگا، آپ اگر اپنا حصہ فروخت کرنا چاہیں تو کر سکتے ہیں، جبکہ خریدار پارٹی کا مطالبہ یہ ہے کہ یا تو مکمل پلاٹ دو یا ڈبل بیعانہ واپس کرو اور اب حمید خان کا کہنا یہ ہے کہ اگر اس کو فروخت ہی کرنا ہے تو جتنی قیمت لگی ہے اسی میں مجھے فروخت کر دو، جبکہ اگر اس نے خریدنا ہی تھا تو پہلے ہی بتاتا کہ بیعانہ ہی نہ لیا جاتا ۔ اب معلوم کرنا ہے کہ اس صورت حال کی روشنی میں خریدار کا ڈبل بیعانہ کا مطالبہ کرنا ، اور مذکور حمید خان کا طرزِ عمل درست ہے یا نہیں؟ اور اس مسئلہ کا حل کیا ہے؟ براہِ کرم جو بھی حکمِ شرعی ہو بیان کر دیا جاوے تاکہ اس کے موافق عمل کیا جاوے۔

الجوابُ حامِدا ًو مُصلیِّا ً

صورتِ مسئولہ کا بیان اگر واقعۃً درست اور مبنی بر حقیقت ہو بایں طور کہ سائل نے واقعہ میں مذکور معاملہ حمید خان کی اجازت سے کیا ہو تو حمید خان کا مذکور طرزِِ عمل شرعاً ناجائز ہے، جس کی وجہ سے وہ سخت گناہ گار ہو رہا ہے ۔ لہٰذا اس کو چاہیئے کہ وہ مذکور معاملہ نبھانے کی کوشش کرے، تاکہ مواخذۂ اخروی سے سبکدوشی ہو سکے ۔ البتہ اگر حمید خان کسی وجہ سے اپنا حصہ فروخت نہ کرنا چاہتا ہو تو باہمی رضا مندی سے بیع فسخ بھی کی جا سکتی ہے ، اور اس صورت میں خریدار کا ڈبل بیعانہ واپس لوٹانے کا مطالبہ کرنا شرعاً درست نہیں۔ اس لئے اس سے احتراز لازم ہے ۔