ایک طلاق کے بعد رجوع کا حکم

السلام علیکم ورحمۃ اللہ وبرکاتہ!
سوال یہ کہ ایک شخص نے اپنی بیوی کو طلاقِ رجعی دیدی اور ایک سال پہلے رجوع کرلیا تھا ، پھر فون پر آپسی جھگڑے میں کہا کہ اگر وہ فلاں جگہ پر ہے تو اس کو تین طلاق ہے ، کیا طلاق ہو جائیگی یا نکاح میں رہنے کی کوئی صورت ہو سکتی ہے ؟

الجوابُ حامِدا ًو مُصلیِّا ً

صورتِ مسئولہ میں اگر شخصِ مذکور نے اپنی مدخول بہا بیوی کو ایک طلاق رجعی دے کر دورانِ عدت ہی رجوع کر لیا تھا ، تو رجوع درست ہو کر نکاح حسبِ سابق برقرار تھا، جبکہ حالیہ واقعہ میں اگر اس کی بیوی مذکور جگہ پر موجود تھی ، اور شخصِ مذکور نے یہ جملہ ( اگر وہ فلاں جگہ پر ہے تو اس کو تین طلاق ہے ) کہا تو اس سے اس کی بیوی پر بقیہ طلاقیں بھی واقع ہو کر حرمتِ مغلّظہ ثابت ہو چکی ہے ، اور چوتھی طلاق محل نہ ہونے کی وجہ سے لغو ہوگئی ہے ، اب رجوع نہیں ہو سکتا ، اور حلالۂ شرعیہ کے بغیر دوبارہ باہم عقدِ نکاح بھی نہیں ہو سکتا ، لہذا دونوں پر لازم ہے کہ فوراً ایک دوسرے سے علیحدگی اختیار کریں ، اور میاں بیوی والے تعلقات ہر گز قائم نہ کریں ، ورنہ دونوں سخت گناہ گار ہوں گے ، جبکہ عورت ایام عدت گزرنے کے بعد دوسری جگہ نکاح کرنے میں بھی آزاد ہوگی۔

مأخَذُ الفَتوی

قال اللہ تعالیٰ: الطَّلَاقُ مَرَّتَانِ فَإِمْسَاكٌ بِمَعْرُوفٍ أَوْ تَسْرِيحٌ بِإِحْسَانٍ(الی قولہ تعالیٰ) فَإِنْ طَلَّقَهَا فَلَا تَحِلُّ لَهُ مِنْ بَعْدُ حَتَّى تَنْكِحَ زَوْجًا غَيْرَهُ (سورۃ البقرۃ آیۃ 228)۔
وفی بدائع الصنائع: وأما الطلقات الثلاث فحكمها الأصلي هو زوال الملك، وزوال حل المحلية أيضا حتى لا يجوز له نكاحها قبل التزوج بزوج آخر؛ لقوله - عز وجل - {فإن طلقها فلا تحل له من بعد حتى تنكح زوجا غيره} [البقرة: 230] ، وسواء طلقها ثلاثا متفرقا أو جملة واحدة؛الخ ( 3/187 فصل وأما حکم البائن ط سعید)۔