شوہر بیوی سے ہم بستری پر طلاق معلق کر نے کے بعد بیوی سے پیچھے کے راستے سے جماع کرے ، تو کیا طلاق واقع ہوجائے گی؟

کیا فرماتے ہیں مفتیان کرام اس مسئلہ کے بارے میں کہ: ایک شخص نے اپنی بیوی کو کہا کہ تم ایک ماہ تک میرے پاس مت آنا،اگر میں ایک ماہ تک تیرے ساتھ ہمبستری کروں تو تجھے ایک طلاق ہے،پھر ایک ماہ تک فرج سے دخول نہیں کیا، لیکن ایک ماہ کے اندر پندرہ بیس دن کے بعد پچھلے راستے سے جماع کیا تھا،کیا ایسے کرنے سے اس پر طلاق واقع ہوگی یا نہیں؟ براہ مہربانی دلیل کے ساتھ اس کا حل فراہم کریں۔

الجوابُ حامِدا ًو مُصلیِّا ً

صور ت مسئولہ میں مذکور جملہ ”اگر میں ایک ماہ تک تیرے ساتھ ہمبستری کروں تو تجھے ایک طلاق ہے“کہنے سے اس شخص کی بیوی پر ایک طلاق رجعی معلق ہوگئی تھی،لہذااس دوران قائل یعنی مذکور جملہ کہنے والا اگر بیوی کے ساتھ فطری راستے سےہمبستری کرے گا تو اس سے بیوی پر ایک طلاق رجعی واقع ہوجائے گی ،اس مدت کے دوران غیر فطری راستے میں دخول کرنےسے اگرچہ طلاق وا قع نہ ہوگی،تاہم بیوی کے ساتھ جماع کےلئے غیر فطری راستہ اختیار کرنا شرعا ناجائز وحرام ہے ،لہذا اس عمل کی وجہ سے مذکور شخص سخت گناہ گار ہواہے، اس پر لازم ہےکہ وہ اپنے عمل پر بصدق دل توبہ واستغفار کرے اور آئندہ کےلئے اس قبیح فعل سے اجتناب بھی کرے۔

مأخَذُ الفَتوی

کمافی الترمذی:عن ابن عباس، قال: جاء عمر إلى رسول الله صلى الله عليه وسلم فقال: يا رسول الله هلكت قال: وما أهلكك؟ قال: حولت رحلي الليلة، قال: فلم يرد عليه رسول الله صلى الله عليه وسلم شيئا، قال: فأوحي إلى رسول الله صلى الله عليه وسلم هذه الآية: {نساؤكم حرث لكم فأتوا حرثكم أنى شئتم} [البقرة: 223] ‌أقبل ‌وأدبر، ‌واتق ‌الدبر ‌والحيضة: " هذا حديث حسن غريب الخ(ابواب تفسیر القرآن، باب: ومن سورة البقرة،ح2980،ج5،ص216،ط:مصطفی البابی الحلبی)۔
وفی سنن ابی داؤد: عن أبي هريرة، قال: قال رسولُ الله صلى الله عليه وسلم: "‌مَلْعُون ‌مَنْ ‌أتَى امرأتَه في دُبُرِها الخ(کتاب النکاح،باب فی جامع النکاح،ح 2162، ج3، ص490،ط:دار الرسالۃ العالمیۃ)۔
وفی التاتارخانیۃ: واذا قال لأمرأتہ ''ان جامعتک فکذا"فیمینہ علی الجماع فی الفرج،حتی لوجامعھا فیما دون الفرج لایحنث فی یمینہ الخ(کتاب الایمان، الفصل الحادی عشرفی العقود،نوع آخر فی الجماع،ج6،ص152،ط:مکتبۃ زکریا)۔