تین معلق طلاقوں کے وقوع سے بچنے کا طریقہ

اگر ایک بندہ یہ بولے کہ اگر میں نے فلاں کام کیا تو میری بیوی میرے اُوپر تین پتھروں پر طلاق ہوگی، کیا اب کوئی صورت ہےکہ بندہ وہ کام بھی کرے اور طلاق بھی واقع نہ ہو ؟ جزاک اللہ

الجوابُ حامِدا ًو مُصلیِّا ً

اگر کوئی شادی شدہ شخص مذکور الفاظ "اگر میں نے فلاں کام کیا تو میری بیوی میرےاُوپر تین پتھروں پر طلاق ہوگی" کہہ دے تو اس سے اُسکی بیوی پر تینوں طلاقیں معلق ہو جائیں گی، چنانچہ اُسکے بعد وہ شخص اگر وہ کام کرلے تو شرط کے پائے جانے کی وجہ سے اُسکی بیوی پر معلق تینوں طلاقیں واقع ہو کر حرمتِ مغلظہ ثابت ہو جائے گی ، جس کے بعد بغیر حلالۂ شرعیہ کے دونوں کا میاں بیوی کی طرح ایک ساتھ رہنا شرعاً جائز نہیں ہوگا، البتہ تینوں معلق طلاقوں سے بچنے کیلئے یہ تدبیر اختیار کی جا سکتی ہے کہ شوہر اپنی بیوی کو ایک طلاقِ بائن دے کر اپنی زوجیت سے الگ کر دے اور دورانِ عدت شوہر وہ کام ہر گز نہ کرے اور پھر جب عدت ختم ہو جائے تو شوہروہ کام کر لے، اس وقت چونکہ بیوی اسکے نکاح میں نہ ہوگی اس لئے اس پر کوئی طلاق واقع نہ ہوگی، اور مذکور شرط بھی پوری ہو جائے گی، اسکے بعد باہمی رضامندی سے باقاعدہ شرعی گواہان کی موجودگی میں نئے حقِ مہر کے تقرر کے ساتھ تجدیدِ نکاح کرلے، تجدیدِ نکاح کے بعد دوبارہ وہ کام کرنے کی وجہ سے مزید کوئی طلاق واقع نہ ہوگی، تاہم آئندہ کیلئے شوہر کو فقط دو (2) طلاقوں کا اختیار ہوگا، اس لئے آئندہ طلاق کے معاملہ میں خوب احتیاط لازم ہے۔

مأخَذُ الفَتوی

کما فی الدر المختار : (و تنحل) اليمين (بعد) وجود (الشرط مطلقا) لكن إن وجد في الملك طلقت و عتق و إلا لا ، فحيلة من علق الثلاث بدخول الدار أن يطلقها واحدة ثم بعد العدة تدخلها فتنحل اليمين فينكحها الخ
و فی رد المحتار تحت : (قوله و تنحل اليمين إلخ) لا تكرار بين هذه و بين قوله فيما سبق و فيھا تنحل اليمين إذا وجد الشرط مرة لأن المقصود هناك الانحلال بمرۃ في غير كلما و هنا مجرد الانحلال اهـ ح و لأنه هنا بين انحلالها بوجودها في غير الملك بخلاف ما سبق۔اھ (3/355).