طلاق معلق کرکے تعلیق سے رجوع کرنا

میرے شوہر نے کہا اگر ٹک ٹاک استعمال کیا تو طلاق ہو جائیگی ، پھر ہماری لڑائی ہوئی انہوں نے مجھے مارا اور بولا ایک طلاق دیتا ہوں ، پھر بولا اب اگر ٹک ٹاک کو اوپن بھی کیا تو دو طلاقیں اور ہو جائیں گی ، میں نے غلطی سے اوپن کر دیا ، پھر میرے شوہر نے کہا میں نے شرط واپس لے لی تھی ، پھر کہا میری نیت نہیں تھی میں ڈرا رہا تھا ، پھر دو سے تین گھنٹے بعد کہا کہ اب دوبارہ اوپن کیا تو طلاق ، پھر اگلے دن بولا میں واپس لے رہا ہوں ، پھر میں نے ٹک ٹاک اوپن کیا بار بار ، کیا طلاق کی شرط واپس لے سکتے ہیں ؟ میں جاننا چاہتی ہوں کیا تین طلاقیں واقع ہوئی ہیں ؟

الجوابُ حامِدا ًو مُصلیِّا ً

واضح ہو کہ طلاق معلق کرنے کے بعد ، شوہر کو اسے واپس لینے کا شرعا کوئی اختیار نہیں ہوتا اور نہ ہی واضح الفاظ میں طلاق دینے کے لئے نیت کی ضرورت ہوتی ہے بلکہ بغیر نیت کے صریح الفاظ کے ساتھ معلق کی جانے والی طلاق بھی تعلیق کی شرط پائی جانے کی صورت میں معلق طلاق واقع ہو جاتی ہے ، لہذا جب شوہر نے تین مختلف مواقع پر اپنی بیوی کے ٹک ٹاک استعمال کرنے اور اسے کھولنے پر تین طلاق معلق کی تھی تو وہ تمام طلاقیں معلق ہو چکی تھیں ، اور بعد میں شوہر کا اسے واپس لینے سے وہ تعلیق ختم نہیں ہوئی ، بلکہ بدستور برقرار رہی ، چنانچہ پہلی تعلیق کے بعد جب شوہر نے لڑائی جھگڑے کے دوران " ایک طلاق دیتا ہوں " جیسے صریح الفاظ سے ایک طلاق رجعی دے دی اور دورانِ عدت رجوع کرلیا تو اس سے رجوع بھی درست ہوا ہے ، اس کےبعد ٹک ٹاک کے کھولنے پر مزید تین طلاقیں معلق کرنے اور بیوی کا اسے کھولنے اور استعمال کرنے پر بقیہ دو طلاقیں بھی واقع ہوکر مجموعی طور پر سائلہ پر تینوں طلاقیں واقع ہوکر حرمتِ مغلظہ ثابت ہوچکی ہے ، جبکہ بقیہ طلاق محل نہ ہونے کی وجہ سے لغو ہوگئی ہیں ، اب رجوع نہیں ہوسکتا ، اور حلالۂ شرعیہ کےبغیر باہم عقدِ نکاح بھی نہیں ہوسکتا ، لہٰذا میاں و بیوی پر فوراً ایک دوسرے سے علیحدگی اختیار کرنا لازم ہے ، ورنہ دونوں سخت گنہگار ہوں گے ، نیز عورت ایام عدت گزر جانے کے بعد اپنی مرضی سے دوسری جگہ نکاح کرنے میں بھی آزاد ہے۔

مأخَذُ الفَتوی

کما فی الھندیۃ : و اذا اضافہ الی الشرط وقع عقیب الشرط اتفاقاً مثل ان یقول لأمرأتہ ان دخلت الدار فأنت طالق الخ ( فصل فی تعلیق الطلاق الخ ، ج 1 ، ص 420 ، ط : ماجدیہ ) ۔
و فیہ ایضاً : و لو قال لھا اذا دخلت الدار أو کلمت فلانا أو صلیت الظھر اذا جاء رأس الشھر فانت طالق ثنتین ( الی قولہ ٰ) لان الرجوع عن التعلیق لا یصح فلا یمکنہ التدارک الخ ( باب فی الاقرار بالنکاح ، ج 4 ، ص 209 ) ۔
وفیہ ایضاً : و ان کان الطلاق ثلاثا فی الحرۃ و ثنتین فی الامۃ لم تحل لہ حتی تنکح زوجا غیرہ نکاحاً صحیحا و یدخل بھا تم یطلقھا او یموت عنھا کذا فی الھدایۃ ( فصل فیما تحل بہ المطلقۃ الخ ، ج 1 ، ص 473 ، ط : ماجدیہ ) ۔