’’اگر میری بیوی دو دن کے اندر نہیں آئی تو وہ میری بیوی نہیں ہوگی‘‘ کہنے سے طلاق کا حکم

کیا فرماتے ہیں مفتیانِ کرام درجِ ذیل مسئلہ کے بارے میں کہ :
میری بیٹی کا رشتہ مردان میں ہوا ہے اور وہ اپنے شوہر کے ساتھ وہیں رہتی تھی، پچھلی چھوٹی عید پر ہم اُسے کراچی لائے تھے اور ان کے شوہر کے ساتھ طے ہوا تھا کہ عید کے دوسرے دن ہم پہنچا دینگے، لیکن دوسرے دن ہم نہ پہنچا سکے، تیسرے دن ان کے شوہر اور میرے داماد محمد عباس نے مجھے فون کیا اور اس سلسلے میں بات کرتے ہوئے میری اور ان کی باتوں میں تیزی اور تلخی آئی، انہی باتوں کے دور ان داماد نے غصہ میں آکر کہا کہ ’’اگر میری بیوی دو دن کے اندر نہیں آئی تو وہ میری بیوی نہیں ہوگی اور میں طلاق بھیج دونگا‘‘ واضح رہے کہ ابھی تک میری بیٹی نہیں گئی، اب آپ حضرات بتائیں کہ کیا میری بیٹی کارشتۂ ازدواج میرے داماد کے ساتھ اب بھی برقرار ہے یا نہیں ؟ اگر رشتہ ختم ہو چکا ہے تو دوبارہ میاں بیوی کی حیثیت سے خانہ آبادی کی شرعاً گنجائش ہے یا نہیں؟
نوٹ: سائل کے داماد نے بھی یہاں آکر ان کے بیان کی تصدیق کی، پوچھنے پر اس نے بتایا کہ یہ بولتے وقت کہ ’’ وہ میری بیوی نہیں ہوگی ‘‘میرے ذہن اور دل میں طلاق کی نیت نہیں تھی۔

الجوابُ حامِدا ًو مُصلیِّا ً

سائل کے داماد کا بیان اگر واقعۃً درست اور مبنی برحقیقت ہو، اس میں کسی قسم کی غلط بیانی سے کام نہ لیا گیا ہو، اس طور پر کہ اس نے مذکور الفاظ ’’اگر میری بیوی دو دن کے اندر الخ‘‘ کہتے وقت طلاق کی نیت نہ کی تھی، تو ان الفاظ سے کوئی طلاق معلق نہ ہوئی تھی، چنانچہ اس کے بعد دو دن کے اند رسائل کی بیٹی کا شوہر کے گھر نہ جانے کی وجہ سے اس پر کوئی طلاق واقع نہیں ہوئی، بلکہ میاں بیوی کا نکاح حسبِ سابق برقرار ہے، لیکن آئندہ کے لۓ طلاق کے معاملہ میں احتیاط لازم ہے۔

مأخَذُ الفَتوی

فی الدر المختار: لست لك بزوج أو لست لي بامرأة. أو قالت له لست لي بزوج فقال صدقت طلاق إن نواه خلافا لهما اھ (3/ 282)۔
وفی الدر المختار: (قوله طلاق إن نواه) لأن الجملة تصلح لإنشاء الطلاق كما تصلح لإنكاره فيتعين الأول بالنية وقيد بالنية لأنه لا يقع بدونها اتفاقا لكونه من الكنايات، وأشار إلى أنه لا يقوم مقامها دلالة الحال لأن ذلك فيما يصلح جوابا فقط وهو ألفاظ ليس هذا منها. وأشار بقوله طلاق إلى أن الواقع بهذه الكناية رجعي، كذا في البحر من باب الكنايات اھ (3/ 283)۔