عملیات کے ذریعہ کسی کو اپنا تابع بنانا

کیا فرماتے ہیں علماء ِکرام و مفتیانِ عظام اس مسئلہ کے بارے میں کہ کچھ عرصہ پہلے مجھے ایک لڑکی سے پیار ہوگیا، مگر یہ یک طرفہ پیار تھا، اسے پانے کے لیے میں نے جادو کا سہارا لیا اور میں کامیاب ہوگیا، یعنی وہ بھی مجھ سے پیار کرنے لگی، اب میں اس سے شادی کر رہا ہوں، مگر میرے ایک دوست نے مجھے بتایا کہ میں یہ غلط کر رہا ہوں اور اس نے یہ بھی کہا ہے کہ میں اسلام سے خارج ہوں ، میں بہت پریشان ہوں اور چاہتا ہوں کہ آپ میری رہنمائی فرمائیں ، اگر میں نے یہ غلط کام کیا ہے تو اس کا کفارہ کیا ہے؟ آپ کی مہربانی ہوگی۔

الجوابُ حامِدا ًو مُصلیِّا ً

سائل نے مذکورعمل کے دوران اگر کسی قسم کے کفریہ عمل کا ارتکاب نہ کیا ہو، بلکہ محض تعویذ کرنے کے لیے کسی عامل کے پاس گیا ہو تو یہ موجبِ کفر نہیں، مگر عملیات کےذریعہ کسی کو اپنا تابع بنانا انتہائی درجہ قبیح حرکت ہے جس سے احتراز لازم ہے۔
اور اب تک اس عملِ قبیح کی وجہ سے جو گناہ سرزد ہوا ہے اس پر بصدقِ دل توبہ بھی کرے، تاہم اگر اس شادی میں فریقین کے خاندان والوں کی رضامندی بھی شامل ہو تو اس میں شرعاً کوئی حرج بھی نہیں۔

مأخَذُ الفَتوی

ففی حاشية ابن عابدين: فليس كل ما يسمى سحرا كفرا، إذ ليس التكفير به لما يترتب عليه من الضرر بل لما يقع به مما هو كفر كاعتقاد انفراد الكواكب: بالربوبية أو إهانة قرآن أو كلام مكفر ونحو ذلك اهـ (1/ 45)۔