اذان میں "علی وصی اللہ ، خلیفۃ بلا فصل"کا اضافہ- اہلِ تشیع کے ساتھ مل بیٹھ کر کھانے کا حکم

کیا فرماتے ہیں علماءِ کرام اس مسئلہ کے بارے میں کہ (۱) اہلِ تشیع اپنی آذانوں میں ’’اشہد ان محمد رسول اﷲ‘‘ کے بعد ’’علی وصی اللہ خلیفۃ بلا فصل‘‘ کے الفاظ کہتے ہیں تو کیا یہ الفاظ قرآن وسنت سے ثابت ہیں یا نہیں؟ برائے مہربانی مفصل دلائل کے ساتھ اس کی وضاحت کریں۔
(۲) میں ایسی جگہ پر کام کرتا ہوں جہاں بہت سے اہلِ تشیع بھی ہیں ہمارا کھانا، پینا بھی آفس ہی میں ہوتا ہے اور سب کیلئے ایک ساتھ کھانا آتا ہے تو اکثر و بیشتر انہی کے ساتھ کھانا پڑتا ہے اور بعض اوقات برتن بھی ایک ہی ہوتا ہے اب اگر ہم ان کے ساتھ نہ کھائیں تو وہ ناراض ہوتے ہیں جس کی وجہ سے آفس میں اختلاف و انتشار پیدا ہونے کا اندیشہ ہے تو کیا اس صورت میں ان کے ساتھ کھانا پینا، سلام و دعا اور فرینڈ شپ رکھنا کیسا ہے؟ برائے مہربانی قرآن و سنت کی روشنی میں جواب مرحمت فرمائیں ،عین نوازش ہوگی-

الجوابُ حامِدا ًو مُصلیِّا ً

(۱) مذکور زائد کلمات کا قرآن و سنت اور قرونِ ثلاثہ مشہود لہا بالخیر سے کوئی ثبوت نہیں بلکہ یہ محض شیعہ لوگوں کی اختراع اور بدعت ہے جس سے احتراز و اجتناب لازم ہے اور اگر سائل مولانا محمد یوسف لدھیانویؒ کی کتاب "شیعہ سنی اختلاف اور صراطِ مستقیم "کو مستقل طور پر اپنے مطالعہ میں رکھے تو اس کیلئے مفید ثابت ہوگا۔
فی سنن ابی داؤد: (باب کیف الاذان) عن محمد بن عبد اﷲ بن زید بن عبد ربہ حدثنی ابی عبد اﷲ بن زید قال لما امر رسول اﷲ ﷺ بالناقوس یعمل لیضرب بہ للناس لجمع الصلوٰۃ طاف بی و انا نائم رجل یحمل ناقوسا فی یدہ قلت یا عبد اﷲ أتبیع الناقوس قال و ما تصنع بہ فقلت ندعوا بہ الٰی الصلوٰۃ قال افلا ادلک علی ما ہو خیر من ذالک فقلت لہ بلٰی قال فقال تقول ﷲ اکبر ﷲ اکبر ﷲ اکبر ﷲ اکبر اشہد ان لا الہ الا ﷲ اشہد ان لا الہ الا ﷲ اشہد ان محمدا رسول ﷲ اشہد ان محمدا رسول ﷲ حی علی الصلوٰۃ حی علی الصلوٰۃ حی علی الفلاح حی علی الفلاح ﷲ اکبر ﷲ اکبر لا الہ الا ﷲ قال ثم استاخر عنی غیر بعید الی اٰخر الحدیث۔ (ج۱،ص۷۲)-
(۲) اگرچہ دفتری مجبوری کی وجہ سے کبھی کبھار ان کے ساتھ بیٹھ کر جائز و حلال چیز کا کھانا خواہ ایک پلیٹ میں ہو یا الگ الگ جائز اور درست ہے مگر اسے معمول بنالینے سے احتراز چاہئے جبکہ اثناء عشری، کفریہ عقائد کے حامل اور متشدد قسم کے شیعوں کو سلام کرنے سے بھی احتراز واجب ہے۔
وقال ﷲ تعالٰی: یا ایہا الذین آمنوا لا تتخذوا عدوی وعدوکم اولیاء۔ (سورۃ الممتحنۃ پارہ ۲۸) وﷲ اعلم