نظر اتارنے کے مختلف طریقے اور ان کا حکم

میں نے اکثر یہ نوٹ کیا ہے کہ گھروں میں خواتین بچوں کی نظر مختلف طریقوں سے اُتارتی ہیں، مثال کے طور پر سات مرچوں کے ذریعے اور انڈے سے وغیرہ وغیرہ، کیونکہ ان کا عقیدہ ہوتا ہے کہ ان چیزوں کی وجہ سے اللہ تعالیٰ ان کے مسائل حل فرمادیں گے، کیا یہ سب کرنا شرک میں نہیں آتا؟
مسنون طریقہ بچوں اور بڑوں کی نظر اُتارنے کا بتادیں۔ جزاک اللہ!

الجوابُ حامِدا ًو مُصلیِّا ً

نظر اُتارنے کا مسنون عمل یہ ہے کہ سورہ قلم کی آخری دو آیات پڑھ کر یا معوذتین یا حدیث میں منقول دعا ’’أعوذ بکلمات اللہ التامّات الخ‘‘ پڑھ کر دم کیا جائے، اس سے نظر کا اثر زائل ہوجاتا ہے، جبکہ مذکور طریقوں میں سے کسی بھی طریقے سے نظر اُتاری جائے اور اسے مؤثر بالذات اور ثابت نہ سمجھا جائے، بلکہ محض ایک ٹوٹکے کے طور پر کیا جائے تو اس میں کوئی گناہ یا شرک نہیں، البتہ اس عمل کے دوران کسی قسم کے شرکیہ کلمات وغیرہ سے دم کیا جائے تو یہ ممنوع ہے اور اس سے شرک بھی لازم آئے گا، جس سے احترازضروری ہے۔

مأخَذُ الفَتوی

ففی المرقاة: وعن ابن عباس رضی اللہ عنہما عن النبی صلی اللہ علیه وسلم قال: العین حق۔ اھ۔ (ج8، ص304)
وفیها ایضًا: وعن عائشة رضی اللہ عنه، قالت امر النبی و ان نسترقی من العین۔ (ج8، ص302)
وفیها ایضًا: (لا باس بالرقی مالم یکن فیه شرك): ای: کفر اه (رواہ مسلم)، (ج8، ص304)
وفیها ایضًا: تحت قوله (من العین) عن عائشة انه کان یقرا علی نفسه المعوذتان وینفث اھ۔ (ج8، ص303)
وفیه ایضًا: وذکر بعض العلماء فی دفع العین قراءة اٰية (وان یکاد الذین کفروا) الی آخر السورة (متفق علیه) اه (ج8، ص303) واللہ اعلم بالصواب!