بدعت کسے کہتے ہیں

کیا فرماتے ہیں علماءِ کرام اس مسئلہ کے بارے میں کہ بدعت کی تعریف یہ ہے کہ وہ کام جو نبی ﷺ نے نہ کیا ہو وہ نیا کام ثواب سمجھ کر کیا جائے تو بدعت ہے جیسے سوئم، چالیسواں، عرس، میلاد النبی۔
نوٹ: خلفائے راشدین ؓ کا عمل بھی سنت ہے۔
حضرت عرباض بن ساریہؓ فرماتے ہیں کہ نبی کریم ﷺ نے فرمایا میرے خلفاء کی سنت کو جو ہدایت یافتہ ہیں مضبوطی سے پکڑلو۔ (ابن ماجہ: ص۵، ابوداؤد: ج۲، ص۲۷۹)
آپ یہ بتائیے کہ زبان سے نماز کی نیت کرنا بدعت سیئہ ہے یا بدعت حسنہ یا مستحب اور یہ بھی بتائیے کہ حضرت خبیبؓ پوری تاریخ اسلامی میں پہلے بزرگ ہیں جنہوں نے قتل ہونے سے پہلے دو رکعت پڑھنے کو رائج فرمایا ملاحظہ ہو صحیح بخاری (ج۲، ص۵۸۵ )اور یہ خلفائے راشدین میں سے نہیں ہیں، یہ عمل بدعت ہے یا نہیں؟

الجوابُ حامِدا ًو مُصلیِّا ً

بدعت ایسا کام کرنے کو کہتے ہیں جس کی اصل کتاب و سنت اور قرونِ ثلاثہ مشہود لہا بالخیر میں نہ ہو اور اس کو دین اور ثواب کا کام سمجھ کر کیا جائے۔
اس تعریف سے واضح ہوگیا ہے کہ جو بھی کام قرونِ ثلاثہ مشہود لہا بالخیر میں دین سمجھ کر کیا گیا ہو اور اس پر کوئی نکیر نہ کی گئی ہو تو وہ بدعت ہرگز نہیں ہوسکتا لہٰذا حضرت خبیبؓ کا قتل ہوتے وقت نماز پڑھنا سنت اور کم از کم مستحب کہلائے گا کیونکہ نبی کریم ﷺ نے ان کے اس فعل پر کوئی نکیر نہیں فرمائی۔
اسی طرح زبان سے نیت کے الفاظ ادا کرنا محض دلجمعی کیلئے ہوتا ہے نہ کہ ثواب کی غرض سے لہٰذا اسے بھی بدعت قرار نہیں دیا جاسکتا۔ واﷲ اعلم

مأخَذُ الفَتوی

ان اول من سن رکعتین عند عن ابی ہریرۃؓ قال بعث النبی ﷺ سریۃ عینًا (إلی قولہ) فاشتری خبیبًا بنو الحارث بن عامر (الی قولہ) فقال دعونی اصلی رکعتین ثم انصرف الیہم فقال لولا أن تروا انّ مابی جذعٌ من الموت لزدت فکالقتل ہُوَ۔ (صحیح بخاری: ج۲، ص۵۸۶)-
ویصل قصد قلبہ صلاتہ بتحریمتہا ہذا تفسیر النیۃ والقصد مع لفظہ افضل۔ (شرح وقایہ: ص۱۵۹)-