’’حضرت علیؓ کا چہرہ دیکھنا عبادت ہے‘‘ اس روایت کی تحقیق

السلام علیکم! کیا فرماتے علماءِ کرام اس مسئلہ کے بارے میں کہ ایک ٹی وی شو میں ایک نوجوان (سنّی) مولوی صاحب نے حضرت عائشہؓ کے حوالے سے یہ حدیث بیان کی کہ حضرت علیؓ کا چہرہ مبارک دیکھنا عبادت ہے ، شو میں بیٹھے ہوئے ایک اور مولانا نے اس کی تفصیل بتائی کہ ایک روز بی بی عائشہؓ صدیقہ نے اپنے والد حضرت ابوبکر صدیقؓ سے سوال کیا کہ آپ حضرت علیؓ کے چہرہ کو ہر وقت اتنے غور سے کیوں دیکھتے رہتے ہیں؟ آپ نے جواباً فرمایا : کہ میں نے حضور نبی اکرم صلی اللہ علیہ و سلم کو یہ کہتے ہوئے سنا ہے کہ ’’علیؓ کا چہرہ دیکھنا عبادت ہے‘‘ شو میں تشریف فرما دیگر علماءِ کرام نے خاموشی اپنائے رکھی ، جس سے ظاہر ہوتا تھا کہ وہ سب بھی اس پر متفق تھے۔
از راہ نوازش مذکورہ بالا حدیث کی حقیقت سے مطّلع فرمائیں ، ہم نے علماءِ کرام سے ہمیشہ یہی سنا اور دینی کتابوں میں یہی پڑھا کہ ازروئے حدیث بیت اللہ اور اپنے والدین کے چہروں کو محبت سے دیکھنا عبادت ہے، اگر صحابہ کرام میں سے کسی کو یہ مرتبہ حاصل ہوتا تو حضرت ابوبکر اس کے سب سے زیادہ مستحق تھے، جنہیں’’افضل البشر بعد الانبیاء بالتحقیق‘‘ کا مقامِ عالی حاصل ہے، بہر حال اگر حضرت علیؓ کے تعلق سے حدیث مستند ہے تو اسے ماننا ہی ہوگا۔
سوال کا تعلق ایمان سے ہے نہ کہ مسلک سے، لہٰذا التماس ہے کہ جواب ضرور عنایت فرمائیں۔

الجوابُ حامِدا ًو مُصلیِّا ً

حدیث کے نام سے یہ الفاظ اگر چہ بعض کتب میں ملتے ہیں ، مگر محققین ، علامہ سیوطی ، ملاقاری ، علامہ ابن الجوزی رحمہم اللہ نے اس کو من گھڑت قرار دیا ہے اور بخاری شریف کی شرح ’’عمدۃ القاری‘‘ میں علامہ عینی رحمۃ اللہ علیہ نے لکھا ہے کہ اس حدیث کا گھڑنے والا حسن بن علی بن زکریا العدوی الرازی ہے ، ٹی وی شو میں بعض نو آموز اہلِ علم کے اس قسم کی روایات ذکر کرنے اور دیگر کے اس پر سکوت سے اس کو مستند قرار نہیں دیا جاسکتا۔

مأخَذُ الفَتوی

فی "احادیث یحتج بھا الشیعة" : النظر الی وجه علی عبادة،، صححه الحاکم 3/ 140و141 من طریقین و تعقبه الذھبی بان کلا الروایتین موضوعة (مختصر استدراک الذھبی3/ 1505) و حکم علیه السیوطی و ملا علی قاری و ابن الجوزی بالوضع اھ (اللآلیء المصنوعة 1/ 314 الاسرار لمرفوعة 1/371 الموضوعات 1/ 268) (1/508)۔
و فی عمدة القاری : و قال ابن حبان و ضع الحسن بن علی بن زکریا العدوی الرازی حدیث النظر الی وجه علی عبادة اھ(3/370)۔