تعلیق طلاق کی ایک خاص صورت اور اس سے نکلنے کا راستہ

کیا فرماتے ہیں علمائے کرام ومفتیانِ عظام اس مسئلہ کے بارے میں !
کہ ایک آدمی نے کہا کہ اگر میں نے ایک سال تک چرس پیا تو میری ہونے والی بیوی جو بھی ہوگی ،اس کو تین طلاق ہے، اور اس نے دو ہفتے بعد چرس پیا، جب اس نے یہ الفاظ کہے اس وقت نہ اسکی بیوی تھی اور نہ ہی منگنی کی تھی ،اگر یہ اب نکاح کرنا چاہےتو کس طرح نکاح کرے ؟ کیا یہ طلاق ِکلّما ہے ؟

الجوابُ حامِدا ًو مُصلیِّا ً

شخص ِمذکور کے ان الفاظ" کہ اگر میں نے ایک سال تک ۔۔۔ الخ " سے شرعا ًتعلیق منعقد ہو چکی ہے، اور اس کے بعد شخصِ مذکور نے شرط کی خلاف ورزی بھی کر لی، اس لئے اب شخصِ مذکور جب بھی کسی عورت سے نکاح کرے گا، تو نکاح کرتے ہی اس عورت پر معلق تین (۳) طلاقیں واقع ہو جائیں گی، لیکن اسکے بعد پھر کسی اور عورت سے نکاح کرنے کی صورت میں کوئی طلاق واقع نہ ہو گی , لہذا شخص مذکور اگر تین طلاقوں سے بچنا چاہتا ہو اور کسی عورت سے نکاح بھی کرنا چاہتا ہو تو اسکو چا ہیئے کہ پہلے کسی ایسی عورت سے نکاح کرےجس کے ساتھ مستقل رہنا مقصود نہ ہو، چنانچہ نکاح ہوتے ہی اس عورت پر تین طلاقیں واقع ہو جائینگی، پھر دوسری جس عورت سے بھی نکاح کرے گا، اس پر طلاق واقع نہ ہو گی۔

مأخَذُ الفَتوی

كما في الهندية: إذا أضاف الطلاق إلى النكاح وقع عقيب النكاح وإذا أضافه إلى الشرط وقع عقيب الشرط اتفاقا ولا تصح إضافة الطلاق إلا أن يكون الحالف مالكا أو يضيفه إلى ملك والإضافة إلى سبب الملك كالتزوج كالإضافة إلى الملك (1/82)۔
وفيها ايضا :الفاظ الشرط إن وإذا وإذما وكل وكلما ومتى و متى ما ففي هذه الألفاظ إذا وجد الشرط انحلت اليمين وانتهت لأنها تقتضي العموم والتكرار فبوجود الفعل مرة تم الشرط وانحلت اليمين فلا يتحقق الحنث بعده إلا في كلما ( ج ۱ ص ۴۱۵)-