کسی کمپنی کے شیئرز خریدنے کے متعلق تفصیلی فتوی

کیا بازار میں حصص کا کاروبار کرنا حلال ہے؟ کیونکہ اس میں بینک منافع متعین نہیں ہوتا ہے۔

الجوابُ حامِدا ًو مُصلیِّا ً

اسٹاک ایکسچینج یا کسی بھی کمپنی یا بینک سے حصص کی خرید و فروخت درجِ ذیل شرائط کے ساتھ جائز اور اس سے حاصل ہونے والا منافع بھی حلال ہے:
(1): جس کمپنی یا ادارے کے حصص خریدے جا رہے ہیں اس کا اصل کاروبار حلال ہو ۔
(۲):فیس ویلیو‘‘ سے کم وبیش پر بیچنے کے لئے ضروری ہے کہ اس کمپنی یا ادارے کے کچھ منجمد اثاثے وجود میں آچکے ہوں ،رقم صرف نقد کی شکل میں نہ ہو، ورنہ ’’فیس ویلیو‘‘ کے برابر رقم کے ساتھ ہی خرید وفروخت جائز ہوگی۔
(۳): ماہانہ یا سالانہ نفع کی کوئی خاص رقم یقینی طور پر مقرر نہ ہو۔
(۴):نفع اور نقصان دونوں میں شراکت ہو۔
(۵):اگر کمپنی سودی لین دین کرتی ہے، تو اس کی سالانہ میٹنگA.G.M. میں سود کے خلاف آواز اٹھائی جائے۔
(۶): جب منافع تقسیم ہو ں تو اس وقت جتنا نفع کا حصہ سودی ڈپازٹ سے حاصل ہوا ہو ،اس کو بلانیتِ ثواب صدقہ کر دے ۔
یہ تب ہے، جب شیئرز خریدنے کا مقصد کسی کمپنی کا حصہ دار بننا ہو، ا ور پھر گھر بیٹھ کر اس کا سالانہ نفع حاصل کرنا ہو، لیکن بعض لوگ اس مذکور غرض سے نہیں خرید تے، بلکہ ان کا مقصد کیپیٹل گین (capitalgain) ہوتا ہے ،یعنی وہ اس کا اندازہ کرتے ہیں کہ کسی کمپنی کے شیئرز کی قیمت میں اضافہ ہونے کا امکان ہے، چنانچہ اس کمپنی کے شیئرز خرید لیتے ہیں، اور پھر چند روز بعد جب قیمت بڑھ جاتی ہے ،فروخت کر دیتے ہیں، اور نفع حاصل کرتے ہیں، اس کی بھی شرعاً مذکور شرائط کے ساتھ گنجائش ہے ۔ لیکن اس کو درست کہنے کی دشواری سٹہ بازی کے وقت پیش آتی ہے ،جو اسٹاک ایکسچینج کا بہت بڑا اور اہم حصہ ہے، جس میں بسا اوقات شیئرز کا لین دین بالکل مقصود نہیں ہوتا، بلکہ آخر میں جا کر آپس کا فرق (ڈیفرنس) برابر کیا جاتا ہے ،اور شیئر ز پر نہ تو قبضہ ہوتا ہے ،اور نہ ہی قبضہ پیش نظر ہوتا ہے ۔لہذا جہاں یہ صورت ہو کہ قبضہ بالکل نہ ہو ،اور نہ لینا مقصود ہو اور نہ دینا مقصود ہو، بلکہ اس طرح سٹہ بازی کر کے ڈیفرنس کو برابر کر لینا مقصود ہو تو یہ صورت بالکل حرام ہے اور شریعت میں اس کی اجازت نہیں ہیں۔
اسی طرح بعض اوقات شئیرز پر قبضہ اور ڈیلیوری سے پہلے ہی ان کو آگے فروخت کر دیا جاتا ہے ،اس کی بھی شریعت میں اجازت نہیں ہے، کیوں کہ شیئرز پر قبضہ ضروری ہے، اور شیئرز کا قبضہ یہ ہے کہ شیئرز ہولڈر اس کے نفع ونقصان کا حقدار بن جائے، جس کو رسک (risk)میں آنے سے تعبیر کیا جاتا ہے۔

مأخَذُ الفَتوی

ففی مشكاة المصابيح: عن ابن عباس قال : أما الذي نهى عنه النبي صلى الله عليه وسلم فهو الطعام أن يباع حتى يقبض . قال ابن عباس : ولا أحسب كل شيء إلا مثله اھ (2/ 141)۔
وفی فتح القدير لكمال بن الهمام: قوله: صلى الله عليه وسلم { لا تبيعن شيئا حتى تقبضه} (15/ 267)۔
في الهداية شرح البداية: ومن اشترى شيئا مما ينقل ويحول لم يجز له بيعه حتى يقبضه لأنه عليه الصلاة والسلام نهى عن بيع مالم يقبض ولأن فيه غرر انفساخ العقد على اعتبار الهلاك اھ (3/ 59) ۔