شئیرز ملکیت میں آنےسے پہلے فروخت کرنا

ترجمہ: پاکستان اسٹاک ایکسچینج میں شیئرز خرید سکتے ہیں یا نہیں، خرید شدہ شیئرز ملکیت میں آنے سے پہلے بیچ سکتے ہیں کہ نہیں، جبکہ ملکیت میں آنے سے پہلے نفع و نقصان کے ذمہ دار ہم ہیں۔۔۔جزاک اللہ خیراً

الجوابُ حامِدا ًو مُصلیِّا ً

اسٹاک ایکسچینج میں شیئرز کی خرید وفروخت اگر درجِ ذیل شرائط کو ملحوظ رکھتے ہوئے کی جائے تو اس صورت میں یہ بلاشبہ جائز ، اور اس سے حاصل ہونے والا نفع بھی جائز اور حلال ہو گا ، وہ شرائط یہ ہیں:
(1) جس کمپنی کے شیئرز خریدے جارہے ہیں اس کا اصل کاروبار حلال ہو۔
(2) اس کمپنی کے کچھ فکسڈ اثاثے (Fixd Assets) بھی وجود میں آچکے ہوں ، یعنی صرف نقد کی شکل میں نہ ہوں ، ورنہ فیس ویلیو (Face Value) کے برابر رقم کے ساتھ ہی خرید و فروخت جائز ہوگی۔
(3) ماہانہ یا سالانہ نفع کی کوئی خاص رقم یقینی طور پر متعین نہ ہو ، بلکہ منافع میں سے فیصد کے حساب سے نفع مقرر کیا گیا ہو۔
(4)نفع و نقصان دونوں میں شراکت ہو۔
(5) اگر کمپنی سودی لین دین کرتی ہے ، تو اس کی سالانہ میٹنگ (A.G.M) میں سود کے خلاف آواز اُٹھائی جائے۔
(6) جب منافع تقسیم ہوں ، تو دیکھ لیا جائے کہ نفع کا جتنا حصہ سودی ڈپازٹ سے حاصل ہوا ہے، اس کو بلا نیتِ ثواب فقراء و مساکین پر صدقہ کردے۔
یہ تب ہےکہ جب شیئرز کی خریدو فروخت کا مقصد کسی کمپنی کا حصہ دار بننا ، اور گھر بیٹھ کر اس کا سالانہ منافع حاصل کرنا ہو، لیکن جو لوگ شیئرز اس غرض سے نہیں خریدتے ، بلکہ ان کامقصد" کیپٹل گین" ہوتا ہے ، تو مندرجہ بالا شرائط کے ساتھ اس معاملے کی بھی شرعاً گنجائش ہے۔
لیکن اس کو درست کہنے میں دشواری ’’سٹہ بازی‘‘ کے وقت پیش آ تی ہے ، جو اسٹاک ایکسچینج کا بہت بڑا اور اہم حصہ ہے، جس میں بسا اوقات شیئرز کا لین دین بالکل مقصود نہیں ہوتا ، بلکہ آخر میں جاکر آپس کا فرق (ڈیفرنس) برابر کرلیا جاتا ہے اور شیئرز پر نہ تو قبضہ ہوتا ہے اور نہ ہی قبضہ پیشِ نظر ہوتا ہے ، لہٰذا جہاں یہ صورت ہو کہ قبضہ بالکل نہ ہو ، اور نہ ہی لینا دینا مقصود ہو ، بلکہ اصل مقصد سٹہ بازی کرکے ڈیفرنس کو برابر کرلینا ہو ، تو یہ صورت بالکل حرام ہے اور شریعت میں اس کی اجازت نہیں ہے،اسی طرح بعض اوقات شیئرز پر قبضہ اور ڈیلیوری سے پہلے ہی ان کو آگے فروخت کردیا جاتا ہے ، اس کی بھی شریعت میں اجازت نہیں ہے، کیونکہ شیئرز پر قبضہ ضروری ہے،چنانچہ ان شرائط کا لحاظ رکھتے ہوئے شیئرز کی خریدوفروخت جائز ہو گی،ورنہ نہیں۔

مأخَذُ الفَتوی