کمپنیوں کے شیئرز اور مالِ حرام کا حکم

شر عی حصص سے ملنے والے منا فع اور بونس کی تطہیر کیسے کریں ؟ پلیز تفصیل اور مثال کے ساتھ سمجھا دیں۔
نوٹ : سائل سے رابطہ کرنے پر معلوم ہوا کہ شرعی حصص سے مراد شیئرز ہیں،اور کمپنی صارفین کو بغیر کسی تخصیص اور شرائط کے کچھ عرصہ بعد منافع اور بونس کے نام سے مزید شیئرز فراہم کرتی ہے۔

الجوابُ حامِدا ًو مُصلیِّا ً

مسئولہ صورت میں کمپنی کا اصل کاروبار اگر حلال ہو ،اور اس میں حرام کی آمیزش ٪50 (فیصد) سے کم ہو ، تو ایسی صورت میں مذکور کمپنی کے شیئرز کی صورت میں ملنے والے منافع بھی شرعاً حلال ہونگے ،البتہ سائل کے ذمے سودی آمیزش کے بقدر رقم صدقہ کرنا شرعاً ضروری ہوگا ،اور یہ حکم بونس شیئرز کا بھی ہے ، تاہم اگر سوال کی نوعیت کچھ اور ہو تو اس کی مکمل تفصیل اور شیئرز کی خرید و فروخت کا طریقہ کار مکمل وضاحت کے ساتھ لکھ کر دوبارہ ارسال کردیں ،اس پر غور کرنے کے بعد حکمِ شرعی سے آگاہ کیا جاسکتاہے۔

مأخَذُ الفَتوی

قال اللہ تعالٰی : احل اللہ البیع و حرم الربوا(البقرۃ:275)-
و فی مرقاۃ المفاتیح : عن جابر رضی اللہ عنہ قال : لعن رسول اللہ ﷺ آکل الربوا و موکلہ و کاتبہ و شاھدیہ ، و قال : ھم سواء (6/51)-
و فی الشامیۃ : و الحاصل انہ ان علم ارباب الاموال وجب ردہ علیھم ، و الا فان علم عین الحرام لایحل لہ و یتصدق بہ بنیۃ صاحبہ و ان کان مالا مختلطا مجتمعا من الحرام و لایعلم اربابہ و لا شیئامنہ بعینہ حل لہ حکما و الاحسن دیانۃ التنزہ عنہ (5/99)-
و فی الدر المختار : کتاب الھبۃ : ھی تملیک العین مجانا ای بلاعوض ، و رکنہا ھو الایجاب و القبول ،الخ
و فی الشامیۃ : افاد ان التلفظ بالایجاب و القبول لایشترط ، بل تکفی القرائن الدالۃ علی التملیک۔(5/687)-