جاب میں رکاوٹ ختم کرنے کیلئے وظیفہ

میری عمر 25 سال ہے اور میں نے اب تک جتنے کام کیے ہیں سب میں کوئی نہ کوئی رکاوٹ آئی ہے ، میں اس چیز کی وجہ سے بہت پریشان ہوں ، کہیں جاب کے لئے درخواست دیتا ہوں تو جاب ہونے کے بعد بھی ختم ہو جاتی ہے یا تو کوئی اور مسئلہ ہو جاتا ہے ، اس وجہ سے میری کہیں جاب نہیں ہو رہی ہے، پڑھائی میں میرا B.com کا ایک پیپر رکا ہوا ہے جو کہ کلئیر نہیں ہو رہا جب کہ میں پڑھائی میں بہت اچھا ہوں، اس وجہ سے میرا تعلیمی مستقبل خراب ہو رہا ہے، برائے مہربانی مجھے کچھ بتائیں کہ یہ سب کس وجہ سے ہے میرےساتھ ؟ میرا کوئی بھی کام شروع ہونے سے پہلے ہی ختم ہو جاتا ہے یا تو بیچ میں اٹک جاتا ہے، برائے مہربانی میری اس پریشانی کا کوئی حل ہے تو ضرور بتائیں ۔

الجوابُ حامِدا ًو مُصلیِّا ً

تمام مشکلات کے حل کے لئے اصل وظیفہ تو رجوع الی اللہ اور منکرات سے اجتناب ہے ، اس کے ساتھ فرائض کی پابندی اور روزانہ رات کو مغرب اور عشاء کے درمیان سورۂ واقعہ اور صلوٰۃ الحاجۃ کا اہتمام کیا جائے تو ان شاء الله مفید رہے گا، اگر سائل کے والدین حیات ہوں تو ان کی خدمت گزاری اور دل جوئی کر کے ان سے دعا بھی کروائے ۔

مأخَذُ الفَتوی

كما في شرح المشكاة للطيبي الكاشف عن حقائق السنن: وعن ابن مسعود، قال: قال رسول الله صلى الله عليه وسلم: ((من قرأ سورة (الواقعة) في كل ليلة لم تصبه فاقة ابداً)). (5/ 1677)۔
و في حاشية ابن عابدين: (قوله وأربع صلاة الحاجة إلخ) قال الشيخ إسماعيل: ومن المندوبات صلاة الحاجة، (إلی قوله) قال مشايخنا: صلينا هذه الصلاة فقضيت حوائجنا اھ (2/ 28)۔
و في مشكاة المصابيح؛ وعنه قال: قال رسول الله صلى الله عليه وسلم: " ثلاث دعوات مستجابات لا شك فيهن: دعوة الوالد ودعوة المسافر ودعوة المظلوم ". رواه الترمذي وأبو داود وابن ماجه اھ (2/ 695)۔