سوال کے جواب میں ہاں میں مسلمان نہیں ہوں کہنے کا حکم

کیا فرماتے ہیں مفتیان کرام اس مسئلہ کے بارے میں کہ دو بہنوں کا آپس میں نماز کے متعلق تکرار ہوا،بڑی بہن نمازوں کی ادائیگی میں سستی کرتی تھی ،چھوٹی بہن نے بہت اصرار کیا سمجھایا کہ نماز پڑھو لیکن بڑی بہن نہیں مان رہی تھی ،تو چھوٹی بہن نے غصے سے کہاکیوں نہیں پڑھتی کیا تم مسلمان نہیں ہو ؟ تو بڑ ی بہن نے کہا "نہیں میں مسلمان نہیں ہوں" اب معلوم یہ کرنا ہے کہ بڑی بہن کا نکاح ہوچکا ہے رخصتی ابھی نہیں ہوئی ہے ،تو معلوم یہ کرنا ہے کہ ایسی صورت میں جبکہ وہ اپنے کہنے پر نادم ہے توبہ بھی کرتی ہے تو کیا تجدیدِ ایمان اورتجدیدِ نکاح ضروری ہے یا نہیں۔

الجوابُ حامِدا ًو مُصلیِّا ً

واضح ہو کہ مذکور جملہ"میں مسلمان نہیں ہوں"کفریہ جملہ ہے ،اور یہ جملہ کہنے والا دائرہِ اسلام سے خارج ہوجاتا ہے ،لہذا سوال میں ذکر کردہ تفصیل کے مطابق بڑی بہن نے ،چھوٹی بہن کے سوال پر جب یہ جملہ کہا "نہیں میں مسلمان نہیں ہوں" تو اس کی وجہ سے وہ دائرہِ اسلام سے خارج ہوچکی تھی،تاہم اس کے بعداگر وہ اپنے کئے پر نادم ہوکر اور کلمہ پڑھ کر توبہ تائب ہوچکی ہوتو اس سے "تجدیدِ ایمان " بھی ہوچکا ہے،البتہ رخصتی کے وقت یا اس سے قبل دو گواہوں کی موجودگی میں تجدیدِ نکاح کرنا اور آئندہ کے لئے اس نوعیت کے کلمات کہنے سے اجتناب لازم ہے،
جبکہ چھوٹی بہن کا اپنی بڑی بہن کو نما ز کی دعوت دینے کے بعد اس پر اس قدر اصرار کرنا کہ وہ کفریہ کلمات کہنے پر مجبورہوجائے اصولِ دعوت کے خلاف انتہائی غلط طرزِ عمل ہے،لہذا چھوٹی بہن کو آئندہ کے لئے اس کے متعلق احتیاط سے کام لینا چاہیے۔

مأخَذُ الفَتوی

کمافی فتاوی العالمگیریۃ: رجل كفر بلسانه طائعا، وقلبه مطمئن بالإيمان يكون كافرا ولا يكون عند الله مؤمنا كذا في فتاوى قاضي خان."(2/283)۔
وفي الفتاوى الهندية: وقد حكي عن بعض أصحابنا أن رجلا لو قيل له ألست بمسلم فقال لا، يكون ذلك كفراً كذا في فتاوى قاضي (2/ 277)۔
وفی رد المختار: وفي الفتح: من هزل بلفظ كفر ارتد وإن لم يعتقده للاستخفاف فهو ككفر العناد. (قوله: من هزل بلفظ كفر) أي تكلم به باختياره غير قاصد معناه۔۔ (4/222)
وفی الفتاویٰ البزازية علٰی هامش الفتاویٰ الہندية: ضرب عبدہ أو ولدہ کثیرا، فقیل له الست بمسلم فقال لا قیل یکفر إذا قال عمدًا وإن قال غلطًا لا یکفر۔ اھ (230/6)۔
وفی الدر المختار : وفی شرح الوھبانیۃ: ما یکون کفراً اتفاقاًیبطل العمل و النکاح واولادہ اولاد الزنا،وما فیہ خلاف یؤمر بالاستعفار والتوبۃ و تجدید النکاح۔(246/6).