وتر کے بعد نفل پڑھنا -فقہ حنفی کی اردو زبان میں چند کتب کی رہنمائی

کیا فرماتے ہیں علماءِ کرام اس بارے میں کہ وتر کے بعد نفل پڑھنا کیسا ہے؟ مجھے بتایا گیا ہے کہ اس کی اجازت ہے، حقیقتاً میں نے ایک حدیث پڑھی ہے کہ اگر تم جانتے ہو کہ تم تہجد کے لئے نہ اُٹھ سکو گے تو تم دو نفل وتر کے بعد پڑھ لو اﷲ تمہیں تہجد کا ثواب دے گا، میں نے یہ حدیث یوسف اصلاحی کی کتاب انسانی حقوق میں پڑھی ہے، دوسرے یہ کہ امریکہ میں مسلمانوں کا خیال ہے کہ وتر کے بعد فجر تک کوئی نماز نہیں ہے۔
کیا آپ قرآن و سنت کی روشنی میں اس کا مسئلہ بتائیں گے؟ مَیں چند معتبر حنفی فقہ کی کتابیں لینا چاہتا ہوں یہ کتابیں عربی اور انگلش میں ہونی چاہئے یا اردو میں؟ جزاک اﷲ خیراً

الجوابُ حامِدا ًو مُصلیِّا ً

جی ہاں وتروں کے بعد (طلوع فجر سے پہلے) نفل پڑھنا جائز اور احادیثِ صحیحہ سے ثابت ہے اور سائل نے یوسف اصلاحی کی کتاب میں جو حدیث پڑھی ہے وہ بھی ثابت ہے، فقہ حنفی کی درجِ ذیل کتابیں خرید کر آپ ان کا مطالعہ کرسکتے ہیں، تاہم کسی مسئلہ کے بارے میں فیصلہ کُن بات کرنے کیلئے باضابطہ کسی عالمِ دین سے رابطہ رکھنا ضروری ہے۔
فی صحیح مسلم: سألت عائشۃؓ عن صلوٰۃ رسول اﷲ ﷺ فقالت کان یُصلِّی ثلاث عشرۃ رکعۃ ثمّ یصلّی ثمان رکعۃ ثمّ یوتر ثمّ یُصلِّی رکعتین وہو جالسٌ فاذا اراد ان یرکع قام فرکع ثم یصلی رکعتین بین النداء والاقامۃ من صلوٰۃ الصبح۔ اھـ (ج۱، ص۲۵۴)-
فقہ حنفی کی چند کتابوں کے نام یہ ہیں: (بہشتی زیور، تعلیم الاسلام، البحر الرائق، الفتاویٰ الھندیہ، فتح القدیر، ہدایہ، رد المحتار المعروف بالشامی)۔ واﷲ تعالیٰ اعلم بالصواب