اجیرِ خاص کا تنظیمی سرگرمیوں کی وجہ سے غیر حاضر ہونا

علماءِ کرام اس اہم مسئلے کے بارے میں کیا کہتے ہیں کہ ملازم ایک اجیر خاص ہے , انہیں دورانِ ملازمت صرف فرض نماز کے علاوہ کسی بھی عبادت کرنے کی اجازت نہیں , آج کل ملازمین کی بہت سے تنظیمیں بن چکی ہیں جن کو اپنے حقوق کے حصول کیلئے بعض اوقات ملازمت کے متعین وقت میں غیر حاضر ہونا پ پڑتا ہے ,احتجاج اور ہڑتالیں کرنے کی صورت میں اپنے بیچ شدہ وقت میں غیر حاضر رہتے ہیں۔
ان اساتذہ کرام کا تنخواہ لینے کے بارے میں قرآن و سنت کی روشنی میں مسئلہ کا جواب مطلوب ہیں۔

الجوابُ حامِدا ًو مُصلیِّا ً

واضح ہو کہ ملازمت کے مقررہ اوقات کو بغیر کسی عذر کے , ادارے کی اجازت کے بغیر کسی دوسرے کام میں لگانا یا غیر حاضر رہنا شرعاً جائز نہیں ، اور اس دن کی یا اتنے وقت کی تنخواہ بھی درست نہ ہوگی ،لہٰذا صورتِ مسئولہ میں متعلقہ ادارے کی اجازت کے بغیر , ملازمت کے مقررہ اوقات میں کسی بھی ملازم کیلئے غیر متعلقہ سرگرمی میں لگنا یا بغیر عذر کےغیر حا ضررہنا جائز نہیں، اور اس دن کی یااتنے وقت کی تنخواہ لینا بھی جائز نہیں ، بلکہ متعلقہ ادارہ غیر حاضری کے بقدر تنخواہ میں سے کٹوتی کرنے میں حق بجانب ہوگا ۔

مأخَذُ الفَتوی

فی الدر المختار : (و الثاني) و هو الأجير (الخاص) و يسمى أجير وحد (و هو من يعمل لواحد عملا مؤقتا بالتخصيص و يستحق الأجر بتسليم نفسه في المدة و إن لم يعمل كمن استؤجر شهرا للخدمة أو) شهرا (لرعي الغنم)اھ(6/69)-
و فی النتف فی الفتاوی : فان وَقعت على عمل مَعْلُوم فَلَا تجب الاجرة الا باتمام الْعَمَل اذا كَانَ الْعَمَل مِمَّا لَا يصلح اوله إِلَّا بِآخِرهِ و ان كَانَ يصلح اوله دون آخِره فَتجب الاجرة بِمِقْدَار مَا عمل و اذا وَقعت على وَقت مَعْلُوم فَتجب الاجرة بِمُضِيِّ الْوَقْت ان هُوَ اسْتَعْملهُ اَوْ لم يَسْتَعْمِلهُ و بمقدار مَا مضى من الْوَقْت تجب الاجرة اھ(2/559)۔