عادت والے ایامِ حیض سے پہلے آنے والے خون کا حکم

کیا فرماتے ہیں علماءِ کرام ومفتیانِ عظام اس مسئلہ کے بارے میں کہ میں نے عمرہ پر جانے کا ارادہ کیا، ماہواری روکنے کے لۓ دوائی استعمال کرنی تھی، لیکن ماہواری وقت سے سات دن پہلے آگئی، ماہواری کا اتنا جلدی آنا سال میں ایک آدھ بار ہی ہوتا ہے، تیسرے دن روانگی تھی، احرام کی نیت کرلی اور باقی دن گھر میں گزارے، دس دن کی کل مدّت ختم ہونے پر بھی جب خون بند نہیں ہوا تو کراچی کے مستند مفتیانِ کرام سے پوچھا، انہوں نے کہا آپ عمرہ ادا کر لیجیے، اب استحاضہ ہے ، میں نے عمرہ کر لیا ، کیونکہ مجھے بھی یقین تھا ، اس لۓ کہ رمضان المبارک میں میرا علاج ہوا تھا، جس میں رحم میں زخموں کو جلایا گیا تھا، وہ کچھ خراب ہو گیا، اور معاملہ ایسا بگڑا کہ مجھے دس بارہ دن استحاضہ کا خون آتا رہا، پھر اگلے مہینے بھی دو بار حیض آیا جو ڈاکٹر کے مطابق ایک حیض اور ایک بار استحاضہ تھا، پھر مجھے تین ماہ برابر حیض آیا ،اب دوبارہ یہ مسئلہ ہوا ہوگا، کیونکہ بیماری کے کچھ آثار باقی تھے اب تک ، اس لۓ عمرے کے بعد اگلے روز بھی طواف کر لیا،لیکن اس وقت پیٹ میں درد اُٹھا جیسے ماہواری کا ہوتا ہے، پھر بدبودار حیض کا خون آنے لگا، میں نے حرم جانا چھوڑ دیا، میرے حساب سے جب حیض ختم ہونا چاہیۓ تھا، اس سے ایک دن پہلے ہلکا سا سفید پانی آگیا ، پھر تھوڑی دیر بعد خون آنے لگا ،مجھے لگا کہ استحاضہ تو چل ہی رہا تھا یقیناً یہ پاکی کے بعد استحاضہ ہی ہوگا ، چودہ روز میں سے صرف دو دن حرم گئی تھی، اس لۓ ایسا ہوا تو میں اپنے دن ضائع کر دوں گی ، یہ استحاضہ ہی ہے چلو حرم چلے ہی جاؤ ، عموماً ایک دن پیلا پانی آکر حیض ختم ہوتا ہے جو نہیں ہوا تھا ، غسل کیا اور طواف کر لیۓ ، پھر ڈیڑھ دن کے بعد بالکل خون بند ہو گیا اور ایک ڈیڑھ گھنٹے پیلا پانی رہا ، میں مکمل صاف ہو گئی ، لکھنا بھول گئی کہ ہمارے ساتھ ایک لیڈی ڈاکٹر تھیں ، جنہوں نے دسویں دن گولیاں خون روکنے کے لۓ شروع کروا دی تھیں، اس طرح مدّت کل سترہ دن رہی، اب یہ استحاضہ ہے یا حیض؟ مجھ پر کتنی نمازیں قضا ہیں ؟ اور دم کس جانور کا واجب ہوتا ہے، گائے کا، اونٹ کا یا بکرےکا؟ براہِ مہربانی اگر آپ مجھے تفصیلی جواب عنایت فرمائیں تو میں آپ کی ممنون ہوں گی ۔
نوٹ: وہاں سے آنے کے اگلے مہینے مجھے حیض صرف ساڑھےچار دن آیا ہے اور عموماً میری عادت سات آٹھ دن کی ہوتی ہے ، اس کے علاوہ آنے کا وقت کبھی بندھا ہوا نہیں ہے، کبھی بہت دن اوپر ہو کر آتا ہے اور کبھی وقت پر آجاتا ہے ، کبھی کبھی دو تین دن پہلے بھی آ جاتا ہے۔
تنقیح: ۱۔ سات یوم سے قبل پاکی کے کتنے ایام گزرے ہیں؟
۲۔ ایام عادت شروع ہونے کے بعد کتنے عرصہ تک خون جاری رہا؟
جوابِ تنقیح:
۱۔ مجھے مارچ کی ۳۰ تاریخ کو خون شروع ہوا، اور یہ پچھلے حیض کے ختم ہونے اور پاکی کے سترہ یا اٹھارہ دن بعد آیا اور دس دن حیض آنے کے بعد میں نے عمرہ کیا۔
۲۔ جب مجھے احساس ہوا کہ یہ حیض کا خون ہے اس کے بعد پانچ روز آیا، میری پچھلی عادتوں کے تحت اس طرح کا خون مجھے تیسرے یا چوتھے دن آتا ہے۔

الجوابُ حامِدا ًو مُصلیِّا ً

ایّامِ عادت سے سات یوم قبل مگر پندرہ دن مدتِ طہر کے بعد آنے والا خون ماہواری کا اور دیگر ایّامِ استحاضہ کے ہیں ، اب اگر استحاضہ کے ایّام میں حرم جانا ہوا ہو یا نمازیں ادا نہ کی ہوں تو اس صورت میں سائلہ پر کوئی دم نہیں، البتہ ان ایّام میں چھوڑی گئی نمازوں کی قضاء لازم ہے۔

مأخَذُ الفَتوی

فی الدر المختار: و(أقله ثلاثة بلياليها) الثلاث،(إلی قوله) وكذا قوله (وأكثره عشرة) بعشر ليال، كذا رواه الدارقطني وغيره. (والناقص) عن أقله (والزائد) على أكثره أو أكثر النفاس أو على العادة وجاوز أكثرهما. (وما تراه) (إلی قوله) (حامل) ولو قبل خروج أكثر الولد (استحاضة.) اھ (1/ 285)۔
وفیه أیضاً: (ودم استحاضة) حكمه (كرعاف دائم) وقتا كاملا (لا يمنع صوما وصلاة) ولو نفلا (وجماعا) لحديث «توضئي وصلي وإن قطر الدم على الحصير» اھ (1/ 298)۔
وفی الفتاوى الهندية: (ودم الاستحاضة) كالرعاف الدائم لا يمنع الصلاة ولا الصوم ولا الوطء. كذا في الهداية اھ (1/ 39)۔