اگر گناہ اللہ کی مرضی سے ہوتے ہیں تو ان پر سزا کیوں؟

کیا فرماتے ہیں مفتیانِ کرام کہ کائناتت کی کوئی چیز بھی اللہ کی قدرت او رمرضی کے بغیر کچھ نہیں کرسکتی ,تو گنہگاروں کے گناہ بھی اللہ کی قدرت اور مرضی سے ہوئے جیساکہ قرآن میں ہے کہ اللہ اگر چاہتاتو کوئی بھی کفر نہ کرتا یا اگر اللہ چاہتا تو سب مسلمان ہوتے تو پھر ان گناہوں پر عذاب کیوں ہوگا؟ اسی طرح اللہ جسے چاہے گمراہ کرتاہے اور جسے چاہے دل پر مہر لگادیتاہے اور جسے چاہے راہ سے بھٹکادیتاہے تو ا س میں گنہگاروں کا کیا قصور کہ انہیں تو اللہ نے گمراہ کیا؟

الجوابُ حامِدا ًو مُصلیِّا ً

واضح ہو کہ اللہ تعالیٰ نے انسان کو مجبور ِمحض پیدا نہیں فرمایا، بلکہ نیکی اور بدی کے کرنے اور نہ کرنے کا اختیار بھی عطا فرمایاہے، چنانچہ اسی اختیار کو استعمال کرتے ہوئے نیکی کا کوئی کام کرے تو عند اللہ ماجور ہوگا اور اگر اسی اختیار کو استعمال کرتے ہوئے بدی کا کوئی کام کرے گا تو عند اللہ ماخوذ ہوگا، اس لئے انسان اگرچہ اللہ تعالیٰ کی مرضی اور قدرت کے مطابق ہی کوئی کام کرتاہے، لیکن ساتھ ساتھ اس کا اپنا ارادہ واختیار بھی شامل ہوتاہے، اور اسی اختیار اور ارادہ کے صحیح اور غلط استعمال پر انسان جزاء اور سزا کا مستحق بنتاہے۔ جبکہ تقدیر کے بارے میں بہت زیادہ غور خوض کرنے سے احادیثِ مبارکہ میں منع کیا گیاہے، اس لئےاس بارے میں زیادہ سوچنے اور اپنی قیمتی وقت ضائع کرنے کی بجائے اعمالِ صالحہ اور آخرت کی تیاری کی فکر کرنی چاہیئے۔

مأخَذُ الفَتوی

کما فی التفسیر روح المعانی للآلوسی: فالعباد منساقون الی ان یفعلوا ما یصدر عنهم باختیارهم لا بالاکراه والجبر. اھ (۱/ ۱۳۳)-
وفی شرح الفقه الاکبر للملا علی القاری: واذا عرفت ذلك فللعباد افعال اختیاریة یثابون علیها ویعاقبون علیها ان کانت معصیة لا کما زعمت الجبریة ان لا فعل للعبد اصلا کسبا ولا خلقا. اھ (ص: ۴۲)-
وفی تکملة فتح الملهم: والحاصل ان العبد لیس خالقا لافعاله وانما هو کاسب لها باختیار اھ (۵/ ۴۶۸)-
وفی شرح العقائد للنسفی: وللعباد افعال اختیاریة یثابون علیها ویعاقبون علیها ان کانت معصیة لا کما زعمت الجبریة انه لا فعل للعبد اصلا. اھ (ص: ۱۸) -