منی ،مذی اور ودی میں فرق کیسے کیا جائے ؟ہر ایک کی پہچان کیا ہے؟

میرا سوال یہ ہے کہ عورت کیلئے یہ بات مشکل ہے کہ مذی، وَدی اور منی کے درمیان تمیز کرسکے، بعض عورتوں سے باقاعدہ مادہ خارج ہوتا ہے، کیسے عورت ان تینوں چیزوں کے درمیان تمیز کرسکتی ہے، اگر ایک عورت اپنی بیٹی کی رہنمائی کرنا چاہے تو کیسے کرے؟ برائے مہربانی تفصیل کے ساتھ جواب دیں، میں اس بارے میں بہت پریشان ہوں۔

الجوابُ حامِدا ًو مُصلیِّا ً

جاننا چاہئے کہ پیشاب کے علاوہ عورت کی شرم گاہ سے نکلنے والی رطوبت منی یا مذی یا ودی ہوتی ہے ان تینوں میں فرق یہ ہے کہ منی لذت سے شہوت کے ساتھ نکلتی ہے، اور عورت کی منی پتلی اور زرد رنگ کی ہوتی ہے اور مذی پتلی سفیدی مائل ہوتی ہے جو اپنے شوہر کے ساتھ بوس و کنار کے وقت نکلتی ہے اور وَدی اس سفید گاڑھے مادے کو کہتے ہیں جو پیشاب کے بعد یا ناقبل برداشت بوجھ اُٹھاتے وقت قطرے نکل آتے ہیں، اسی طرح ایک اور رطوبت کا بھی اخراج ہوتا ہے اس کو لیکوریا کہتے ہیں، ان کا حکم یہ ہے کہ لیکوریا، مذی اور ودی کے نکلنے سے وضو ٹوٹ جاتا ہے جبکہ منی کے اخراج سے غسل لازم ہوجاتا ہے، اپنی اولاد کو ان احکامات کے متعلق آگاہ کرنے کیلئے بہشتی زیور مصنفہ مولانا اشرف علی تھانویؒ، کا مطالعہ مفید رہے گا۔

مأخَذُ الفَتوی

فی الدر المختار: (لا) عند (مذی أو ودی) بل الوضوء منه الخ وفی رد المحتار تحت قوله: (قوله لا عند مذی) أی لا یفرض الغسل عند خروج مذی (إلی قوله) (قوله أو ودی) بمهملة ساكنة ویاء مخنفة (الی قوله) ماء ثخین أبیض كدر یخرج عقب البول نهر. الخ (ج۱، ص۱۶۵)
وفیه ایضًا: (وفرض) الغسل (عند) خروج (منی) الخ وفی الشامیة تحت قوله (قوله منی) أی منی الخارج منه الخ (ج۱، ص۱۵۹)
وفی الفتاوی الهندیة: ومنی المرأة رقیق أصفر والمذی رقیق یضرب الی البیاض یبدو خروجه عند الملاعبة مع أهله بالشهوة (الی قوله) المذی ینقض الوضوء وكذا الودی الخ (ج۱، ص۱۰)