میں نے پارٹ ٹائم بزنس کے طور پر ایک کھاد بنانے والی کمپنی کے شیئرز خریدے اور منافع پر بیچ دیے۔ اب میں مزید شیئرز خریدنا چاہتا ہوں۔ مجھے یہ بتا دیں کہ اگر کسی کمرشل یا اسلامی بینک کے شیئرز خریدوں تو کیا یہ بھی درست ہے؟میرے علم کے مطابق سود اس منافع کو کہتے ہیں جو بغیر محنت کے ملے، یعنی فکسڈ ڈپازٹ یا کسی کو رقم ادھار دے کر اس پر سود لینا، جبکہ شیئرز کے کاروبار میں نفع و نقصان کے امکانات برابر ہوتے ہیں۔ چاہے بینک کے شیئرز خریدیں یا کسی اور کمپنی کے، شریعت کی رو سے بینک کے شیئرز کا کاروبار کیسا ہے؟
شیئرز کا کاروبار درج ذیل چار شرطوں کے ساتھ جائز ہے۔
(1) جس کمپنی کے شیئرز خریدے جا رہے ہوں، اس کا بنیادی کاروبار حلال ہو۔
(2) اس کمپنی کے تمام اثاثے اور املاک سیال اثاثوں، یعنی نقد رقم کی شکل میں نہ ہوں، بلکہ کمپنی نے کچھ فکسڈ اثاثے حاصل کر لیے ہوں، مثلاً بلڈنگ بنائی ہو یا زمین خرید لی ہو۔
(3) کمپنی کا بنیادی کاروبار تو حلال ہو، لیکن سودی لین دین کرتی ہو تو اس صورت میں اس کی سالانہ میٹنگ میں سودی لین دین کے خلاف آواز اٹھائی جائے۔
(4) چوتھی شرط، جو حقیقت میں تیسری شرط ہی کا ایک حصہ ہے، وہ یہ ہے کہ جب منافع تقسیم ہو تو وہ شخص انکم اسٹیٹمنٹ کے ذریعے معلوم کرے کہ آمدنی کا کتنا فیصد حصہ سودی ڈپازٹ سے حاصل ہوا ہے، پھر جتنا حصہ سودی ڈپازٹ سے حاصل ہوا ہو، اس کو صدقہ کر دے۔
جبکہ سودی بینک کے شیئرز کا کاروبار پہلی شرط کے خلاف ہونے کی وجہ سے جائز نہیں، اس سے احتراز لازم ہے۔