انشورنس کمپنی میں رسک انجینئیر کی ملازمت کا حکم

السلام علیکم !سوال یہ ہے کہ کسی انشورنس کمپنی میں بحیثیت رسک انجینئر نوکری کرنا حلال ہے یا نہیں؟رسک انجینئر کا کام مختلف فیکٹریز میں جا کر ان کے آگ لگنے کی صورت میں کیے گئے انتظامات کو جانچنا، یا پھر ان کی مشینری کو چیک کرنا، یا پھر ان کے جنریٹر وغیرہ کا معائنہ کرنا اور ان کی تصویریں بنا کر ایک تفصیلی رپورٹ تیار کرنا ہوتا ہے۔جس طرح باقی محکموں میں جیسے آئی ٹی والے، سافٹ ویئر والے، یا پھر کچن میں کام کرنے والے حضرات کا کسی مالی لین دین یا انشورنس پالیسی کی خرید و فروخت سے کوئی تعلق نہیں ہوتا، اسی طرح رسک انجینئر بھی صرف اور صرف ٹیکنیکل سروے کرتا ہے اور رپورٹ تیار کرتا ہے۔کیا اس نوکری سے کمائی گئی تنخواہ حلال ہوگی؟آپ کا بہت شکریہ جزاکم اللہ خیرا

الجوابُ حامِدا ًو مُصلیِّا ً

واضح ہو کہ مروجہ کمرشل انشورنس کا نظام شرعاً ناجائز ہے، اور جس طرح اس کے عقد و معاملات میں براہِ راست شرکت ناجائز ہے، اسی طرح ایسے امور میں معاونت بھی درست نہیں، کیونکہ یہ “تعاون علی الاثم” میں داخل ہے۔لہٰذا صورتِ مسئولہ میں اگرچہ رسک انجینئر براہِ راست انشورنس کے مالی معاہدات میں شریک نہیں ہوتا، لیکن اس کی تیار کردہ رپورٹ ہی انشورنس کے آئندہ فیصلوں اور پالیسی کے اجرا کی بنیاد بنتی ہے، تو یہ عمل درحقیقت اس ناجائز نظام کی معاونت شمار ہوگا،اس لیے ایسی ملازمت اور اس سے حاصل ہونے والی آمدنی شرعاًجائزنہیں ،جس سے اجتناب لازم ہے۔

مأخَذُ الفَتوی

کما فی الصحیح لمسلم: عن جابر رضی اللہ عنہ قال لعن رسول اللہ صلی اللہ علیہ و سلم آکل الربا و موکلہ و کاتبہ و شاھدیہ و قال ھم سواء ( کتاب البیوع ج: 3 ، ص: 1219، ط: دار إحیاء التراث العربی)۔
و فی تکملۃ فتح الملھم : قولہ "و کاتبہ " لان کتابۃالربا اعانۃ علیہ و من ھنا ظھر ان التوظف فی البنوک الربویۃ لایجوز فان کان عمل الموظف فی البنک مایعین علی الربا کالکتابۃ او الحساب فذالک حرام لوجھین : الاول : اعانۃ علی المعصیۃ و الثانی : اخذالاجرۃ من المال الحرام فان معظم دخل البنوک حرام مستجلب بالربا و اما اذا کان العمل لاعلاقۃ لہ بالربا فانہ حرام للوجہ الثانی فحسب فاذا وجد بنک معظم دخلہ حلال جاز فیہ التوظف للنوع الثانی من الاعمال(باب أخذالحلال وترك الشبهات،ج:1،ص:619،ط:دارالعلوم کراتشی)