ایزی پیسہ میں سافٹ وئیر انجینئر کی ملازمت کا حکم

کیا ایزی پیسہ کی کمپنی میں بطور سافٹ ویئر انجینئر ملازمت کرنا جائز ہے؟میں اس سے پہلے ایک او ٹی ٹی پلیٹ فارم میں کام کرتا تھا جہاں میوزک وغیرہ دکھایا جاتا تھا، وہاں بھی کہا جاتا تھا کہ وہ مشکوک ہے۔اب ایزی پیسہ میں بھی کچھ لوگ کہتے ہیں کہ یہ جائز نہیں ہے۔آج کل زیادہ تر کام فِن ٹیک (Fintech) کے میدان میں ہی ہے، اور زیادہ تر نوکریاں بھی فِن ٹیک سے متعلق ہی ہوتی ہیں۔براہِ کرم راہنمائی فرمائیں۔

الجوابُ حامِدا ًو مُصلیِّا ً

صورت مسئولہ میں ایزی پیسہ کمپنی میں بطور سافٹ ویئر انجینئر ملازمت کا حکم یہ ہے کہ چونکہ ایسی مالیاتی کمپنیوں میں تیار کیے جانے والے سافٹ ویئر ز عمومی طور پر مختلف جائز مالی خدمات جیسے رقم کی ترسیل ، اکاؤنٹ مینجمنٹ ، اور ڈیجیٹل پیمنٹس وغیرہ کے لیے بھی استعمال ہوتے ہیں اور ان کا استعمال صرف سودی یا حرام لین دین کے ساتھ مخصوص نہیں ہوتا، اس لیے محض بطور سافٹ ویئر انجینئر اس کمپنی میں ملازمت کرنا شرعاً جائز ہے، اور اس سے حاصل ہونے والی آمدنی بھی حلال ہے، البتہ اگر کسی مخصوص پراجیکٹ یا سافٹ ویئر کا تعلق براہ راست سودی لین دین کو قائم رکھنے ، اس کے نظام کو چلانے، یا اسی کے ساتھ خاص ہو اور اس کا کوئی جائز متبادل استعمال ممکن نہ ہو تو ایسی صورت میں اس میں تعاون جائز نہیں ہوگا، لہذا مجموعی طور پر مذکورہ ملازمت کی گنجائش موجود ہے۔

مأخَذُ الفَتوی

کما فی المبسوط للسرخسی: إعلم أن الاجارۃ عقد علی المنفعۃ بعوض ھو مال الخ (کتاب الاجارات، ج: ١٥، ص: ٧٤، ط: دار المعرفۃ۔ بیروت)۔
وفي بدائع الصنائع: وهي في الحقيقة نوع واحد لأنها بيع المنفعة فكان المعقود عليه المنفعة في النوعين جميعا إلا أن المنفعة تختلف باختلاف محل المنفعة فيختلف استيفاؤها باستيفاء منافع المنازل بالسكنى والأراضي بالزراعة الخ ( کتاب الاجارۃ،ج: ٤، ص:١٧٥ ط: ایچ ایم سعید)۔
کما فی تكملة فتح الملھم: ان التوظف فی البنوك الربوية لا يجوز، فان كان عمل المؤظف فی البنك ما يعين على الربا، كالكتابة أو الحساب، فذالك حرام لوجھين الأول إعانة على المعصية و الثانی أخذ الأجرة من مال الحرام، فإن معظم دخل البنوك حرام مستجلب بالربا، و أما إذا كان العمل لا علاقة له بالربا فإنه حرام لوجه الثانی فحسب، فإذا وجد بنك معظم دخله حلال جاز فيه التوظف للنوع الثانی من الاعمال إلخ۔ (باب لعن أکل الربا و موکلہ،ج:١، ص:٦١٩، مط: دار العلوم کراچی)