سودی اکاؤنٹ سے سیلری دینے والی کمپنی میں ملازمت کا حکم

میرا سوال یہ ہے کہ میں جس کمپنی میں ملازمت کرتا ہوں، وہ "رَننگ فنانس" یعنی سودی نظام پر مبنی اکاؤنٹ چلاتی ہے اور ہماری تنخواہ بھی اسی سود والے اکاؤنٹ سے دی جاتی ہے،جب میں نے یہ ملازمت شروع کی تھی تو مجھے اس بات کا علم نہیں تھا کہ کمپنی سودی اکاؤنٹ استعمال کرتی ہے اور پورا نظام سود پر چل رہا ہے۔ اب مجھے یہ بات بعد میں معلوم ہوئی ہے کہ ہماری تنخواہ سودی اکاؤنٹ سے دی جاتی ہے۔میرا سوال یہ ہے کہ اب میرے لیے کیا حکم ہے؟کیا مجھے یہ ملازمت چھوڑ دینی چاہئیے؟اور اس صورت میں گناہ کس پر ہوگا؟کیا مجھے بھی اس کا گناہ ملے گا؟براہِ کرم رہنمائی فرمائیں۔

الجوابُ حامِدا ًو مُصلیِّا ً

مذکورکمپنی کا بنیادی کاروبار اگر حلال اور جائز ہو تو اس کے مالکان کاسودی قرضہ لینے کی وجہ سے ملازمین کی ملازمت اور تنخواہ پر کوئی اثر نہیں پڑتا، لہذا سائل کا اس کمپنی میں ملازمت کرنا اور اس سے تنخواہ لینا شرعاً جائز اور درست ہے،البتہ اگر مذکور کمپنی کا بنیادی کاروبار یا غالب کاروبار سود کے لین دین پر مشتمل ہو تو اس صورت میں مذکور کمپنی میں ملازمت کرنے سے احتراز چاہئیے، جبکہ سائل نے لاعلمی میں جتنا عرصہ ملازمت کی ہے اور اسے اس دوران سودی اکاؤنٹ سے تنخواہ دی جاتی رہی ہے، اس کا گناہ سائل کے بجائے سودی اکاؤنٹ کھلوانے والی کمپنی کے مقررکردہ ذمہ داران پر ہوگا، سائل ان کے مذکور عمل سے بری الذمہ ہے اور بروزِ قیامت اس لاعلمی سے سرزد ہونے والی گناہ کا مواخذہ نہیں ہوگا،انشاءاللہ۔

مأخَذُ الفَتوی

کمافی الھندیة: ولا يجوز قبول هدية أمراء الجور؛ لأن الغالب في مالهم الحرمة إلا إذا علم أن أكثر ماله حلال بأن كان صاحب تجارة أو زرع فلا بأس به؛ لأن أموال الناس لا تخلو عن قليل حرام فالمعتبر الغالب، وكذا أكل طعامهم الخ (الباب الثانی عشر فی الھدایا،ج:5،ص:342،ط:ماجدیۃ)۔
وفی المحیط البرہانی: رجل أهدى إلى إنسان أو أضافه إن كان غالب ماله من حرام لا ينبغي أن يقبل ويأكل من طعامه ما لم يخبر أن ذلك المال حلال استقرضه أو ورثه، وإن كان غالب ماله من حلال فلا بأس بأن يقبل ما لم يتبين له أن ذلك من الحرام؛ وهذا لأن أموال الناس لا تخلو عن قليل حرام وتخلو عن كثيره، فيعتبر الغالب ويبنى الحكم عليه الخ( كتاب الاستحسان والکراهية ، الفصل السابع عشر في الهدايا والضيافات،ج:5،ص:347،ط:دارالکتب العلمیة)۔