اللہ تعالی اور رسول اللہ ﷺ کے متعلق برے وساوس کے آنے کا حکم

مفتی صاحب! اللہ اور رسولﷺ کے بارے میں گندے خیالات اور وسوسوں کا آنا کیسا ہے؟ میں بہت گھبراتا ہوں ، اس سے کئی دفعہ ایسے لگتا ہے کہ میرا ایمان نہ چلا جائے ، یا میرا ایمان چلا گیا ،نماز میں بھی ایسے خیالات اور وسوسے آتے ہیں ، اور نماز کے بغیر بھی ، آپ سے درخواست ہے کہ اس کا جواب جلد از جلد دیں آپ کی مہربانی ہوگی ۔

الجوابُ حامِدا ًو مُصلیِّا ً

واضح ہو کہ غیر ارادی طور پر خیالات اور وسوسے آنے سے انسان دائرۂ اسلام سے خارج نہیں ہوتا ، چاہے اس طرح کے وسوسے نماز کے دوران آئیں یا عام حالات میں ، البتہ سائل کے دل میں جب اس طرح کے وسوسے آئیں تو اُنہیں برا سمجھے اور ذہن سے نکال کر کسی دوسرے کام میں مشغول ہو جائے ، ان وساوس کی طرف بالکل بھی دھیان نہ دے ، نیز سائل کو چاہیئے کہ طہارت کا خاص خیال رکھے ، اور اس کے ساتھ سورۂ مومنون کی آیت نمبر ۹۷ اور ۹۸ (رَبِّ أَعُوذُ بِكَ مِنْ هَمَزَاتِ الشَّيَاطِينِ (۹۷) وَ أَعُوذُ بِكَ رَبِّ أَنْ يَحْضُرُونِ (۹۸) بکثرت پڑھا کرے ، إن شاء اللہ تعالیٰ اس سے فائدہ ہوگا۔

مأخَذُ الفَتوی

کما فی مشكاة المصابيح : عن أبي هريرة رضي الله عنه قال : جاء ناس من أصحاب رسول الله صلى الله عليه و سلم إلى النبي صلى الله عليه و سلم فسألوه : إنا نجد في أنفسنا ما يتعاظم أحدنا أن يتكلم به . قال : أو قد وجدتموه قالوا : نعم . قال : ذاك صريح الإيمان۔الحدیث (1/26)۔
و فیه أیضاً : عن أبي هريرة رضي الله عنه قال : قال رسول الله صلى الله عليه وسلم : لا يزال الناس يتساءلون حتى يقال هذا خلق الله الخلق فمن خلق الله ؟ فمن وجد من ذلك شيئا فليقل : آمنت بالله و رسله۔الحدیث (1/26)۔
و فی مرقاة المفاتيح شرح مشكاة المصابيح : و قيل المعنى أن الوسوسة أمارة الإيمان ؛ لأن اللص لا يدخل البيت الخالي۔اھ (1/137)۔