زکوٰۃ کی کٹوتی سے بچنے کیلئے سرکاری کاغذات میں ،اپنے کو فقہ جعفریہ والا لکھوانا

کیا فرماتے ہیں مفتیانِ کرام و علماءِ حق اس مسئلہ کے بارے میں کہ ایک ادارہ میں اہل سنت والجماعت عقائد کے افراد ملازمت کررہے ہیں اور اپنی ملازمت رضا کارانہ طور پر چھوڑ کر یا ریٹائرمنٹ پر صرف اس وجہ سے کہ اس کے جمع شدہ فَنڈ میں سے زکوٰۃ کی کٹوتی نہ ہو ، فقہ جعفریہ ظاہر کرکے اس زکوٰۃ کی کٹوتی جو کہ حکومتِ اسلامی جمہوریہ پاکستان کے فرمان کے مطابق از خود منہا کردی جاتی ہے اپنے آپ کو اس کٹوتی سے محفوظ کرلیتا ہے حالانکہ سب کو علم ہے کہ یہ شخص فقہ حنفی یا شافعی، مالکی، حنبلی وغیرہ ہے اور ہرگز فقہ جعفریہ سے اس کا تعلق نہیں لیکن جعلی طور پر اس فارم کو جو کہ غالباً حلف نامہ ہی ہوتا ہے اور یہ صرف ان ہی لوگوں کیلئے سرکار نے بنایا ہے جو اپنے آپ کو فقہ جعفریہ والے کہتے ہیں نیز یہ مذکورہ بالا اشخاص یہ توجیہ پیش کرتے ہیں کہ ہمیں حکومت پر اعتبار نہیں ہے لہٰذا ہم خود اپنے ہاتھوں سے زکوٰۃ ادا کریں گے ، آیا اہل سنت والجماعت کے افراد کو یہ طرزِ عمل اختیار کرنا چاہئے یا نہیں؟ اور اگر کوئی جان بوجھ کر یہ عمل اختیار کرتا ہے تو اس کے ایمان و عقیدے کے بارے میں کیا حکم ہوگا؟ ازراہِ مہربانی شریعتِ محمدی ﷺ کی روشنی میں مفصل جواب مرحمت فرمائیں۔ شکریہ!

الجوابُ حامِدا ًو مُصلیِّا ً

صورتِ مسئولہ میں زکوٰۃ کی کٹوتی سے بچنے کیلئے مذکورہ طریقہ اختیار کرکے اپنے آپ کو ایک باطل فرقہ کی طرف منسوب کرنا قطعاً جائز نہیں کیونکہ یہ محض دھوکہ ہے اور کسی دوسرے کو دھوکہ دینا شرعاً ناجائز اور حرام ہے لہٰذا اس طریقہ کار سے احتراز لازم اور ضروری ہے البتہ مذکور عمل اگر فقط اس لئے کیا جاتا ہے کہ خود اپنی زکوٰۃ کو صحیح مصرف تک پہنچاۓ ، تو اس کیلئے بہتر صورت یہ ہے کہ بینک کی کٹوتی کی تاریخوں سے پہلے اپنے اکاؤنٹ سے رقم نکلوالی جائے اور اگر مجبوری کے تحت بینک میں رقم رکھنی پڑجائے تو بینک کے (A/C) یعنی کرنٹ اکاؤنٹ میں جمع کروالیں۔

مأخَذُ الفَتوی

فی الفتاوٰی الھندیۃ: و من أتی بلفظۃ الکفر و ہو لم یعلم انہا کفر الّا انّہ أتی بہا عن اختیارٍ یکفر عند عامۃ العلماء خلافا للبعض و لا یعذر بالجہل کذا فی الخلاصۃ۔
و أیضًا فیہا: رجلٌ کفر بلسانہ طائعًا و قلبہ مطمئن بالإیمان یکون کافرًا ولا یکون عنداللّٰہ مؤمنًا۔کذا فی فتاوٰی قاضیخان۔(ج۲، ص۲۸۳)۔