کافر اور مشرک کسے کہا جاۓ گا ؟ بریلوی کافر ہیں یا بدعتی؟

کن کن لوگوں کو کافر کہنا جائز ہے اور کن کو جائز نہیں ،تفصیل سے لکھیں؟مثلاً : بعض لوگ بریلویوں کو کافر کہتے ہیں ، بعض مشرک کہتے ہیں اور بعض کہتے ہیں کہ اُن کو کافر کہنا صحیح نہیں ہے، بلکہ یہ بدعتی ہیں۔

الجوابُ حامِدا ًو مُصلیِّا ً

جو لوگ واقعۃً کافر و مشرک ہیں انہیں کافر کہنے میں کوئی حرج نہیں، البتہ کسی مسلمان کو کافر کہنے سے احتراز لازم ہےاور جہاں تک کسی بریلوی کو کافر کہنے کا مسئلہ ہے تو اس سلسلہ میں عرض یہ ہے کہ اکثر بریلویت جہالت اور دینِ متین سے دوری پر مبنی ہے جس کی وجہ سے ان سب پر کفر یا شرک کا حکم لگانا یقیناً درست نہیں، البتہ جو شخص اللہ تعالیٰ کی ذات یا صفاتِ مخصوصہ کو حضور صلی اللہ علیہ و سلم کے لیے یا کسی بزرگ کے لیے ثابت کرے اور عقیدۃً اس کا قائل ہو ، جیسا کہ بعض بریلوی اس معاملہ میں بڑی شدّت اور غلو سے کام لیتے ہیں اور آپ صلی اللہ علیہ وسلم کو ماکان و مایکون کا عالم الغیب کُلی مانتے ہیں یا آپ صلی اللہ علیہ وسلم کو ہر جگہ حاضر و ناظر اور مختارِ کُل مانتے ہیں یا آپ کی بشریت کے منکر ہیں تو وہ کافر اور مشرک کی تعریف میں داخل ہونے کی بناء پر سخت گناہ گار ہیں اور جو بریلوی مذکور قسم کے شرکیہ عقائد نہیں رکھتے ، بلکہ صرف اذان سے پہلے صلوٰۃ و سلام کو خاص کرتے ہیں یا شہادتین پر انگوٹھے چومتے ہیں یا اس قسم کی دیگر بدعات کا ارتکاب کرتے ہیں، وہ مبتدع ہیں، کافر و مشرک نہیں۔

مأخَذُ الفَتوی

في صحيح البخاري : حدثنا محمد بن يوسف حدثنا سفيان عن إسماعيل عن الشعبي عن مسروق عن عائشة رضي الله عنها قالت من حدثك أن محمدا صلى الله عليه وسلم رأى ربه فقد كذب و هو يقول ﴿لا تدركه الأبصار﴾ و من حدثك أنه يعلم الغيب فقد كذب و هو يقول لا يعلم الغيب إلا الله اھ(9/ 116)۔
في شرح السنة للبربهاري : و لا نخرج أحدا من أهل القبلة من الإسلام حتى يرد آية من كتاب الله ، أو يرد شيئا من آثار رسول الله صلى الله عليه وسلم أو يذبح لغير الله ، أو يصلي لغير الله ، فإذا فعل شيئا من ذلك فقد وجب عليك أن تخرجه من الإسلام ، و إذا لم يفعل شيئا من ذلك فهو مؤمن مسلم بالاسم لا بالحقيقة اھ(ص: 64)۔
و في رياض الصالحين : عن ابن عمر رضي الله عنهما ، قال : قال رسول الله صلى الله عليه وسلم : (( إذا قال الرجل لأخيه : يا كافر ، فقد باء بها أحدهما ، فإن كان كما قال و إلا رجعت عليه )) متفق عليه . (2/ 266)۔