حیض کی ایک خاص صورت(طہرِناقص) کا حکم

السلام علیکم!
ایک مسئلہ کا حل پوچھنا ہے ، جو استحاضہ سے متعلق ہے، مسئلہ یہ ہے کہ حیض سے متعلق ایک عادت مقرر تھی کہ ہر ماہ ۲۲ تاریخ کو شروع ہوتا تھا، لیکن پچھلے مہینے غسل کو پندرہ دن سے زیادہ گزر گئے تھے، لیکن عادت سے پہلے ۱۳ تاریخ کو حیض شروع ہوگیا ، جس میں نماز نہیں پڑھی، پھر غسل کے ۵ دن بعد ۲۵ تاریخ کو حیض سے خون جاری ہوگیا ، اب اس وقت کیا کیا جائے، نماز پڑھیں یا نہیں؟
تنقیح : ۲۲ تاریخ سے شروع ہونے والا خون عادت کے موافق ، کس تاریخ تک جاری رہتا تھا؟
جواب تنقیح : ہر مہینے کی ۲۲ تاریخ کو جاری ہونے والا خون ۵ یا ۶ دن جاری رہتا تھا ۔

الجوابُ حامِدا ًو مُصلیِّا ً

صورتِ مسئولہ میں طہر کی کم سے کم مدت (جو کہ پندرہ دن ہے) گزرنے کے بعد تیرہ تاریخ کو جاری ہونے والا خون حیض شمار ہوگا اور چونکہ تیرہ تاریخ کو شروع ہونے والا خون بیس تاریخ تک رہا اور پھر پچیس تاریخ کو شروع ہو گیا تو یہ درمیانی پانچ دن کا وقفہ اقلِ مدت طہر سےکم ہے ، اس لۓ اس وقفہ کے پہلے تین دن بھی حیض شمار ہو کر تیرہ تاریخ سے تیئس تاریخ تک حیض کے ایام شمار ہوں گے اور اس کے بعد پچیس تاریخ سے آنے والا خون استحاضہ ہے ، جس میں سائلہ روزہ ، نماز اور دیگر عبادات بلاشبہ بجا لا سکتی ہے۔

مأخَذُ الفَتوی

فی الدر المختار : (و أقل الطهر) بين الحيضتين أو النفاس و الحيض (خمسة عشر يوما) و لياليها إجماعا اھ (1/ 285)۔
و فی حاشية ابن عابدين : قول أبي يوسف : إن الطهر المتخلل بين الدمين لا يفصل ، (إلی قوله) و لو رأت المعتادة قبل عادتها يوما دما و عشرة طهرا و يوما دما فالعشرة التي لم تر فيها الدم حيض إن كانت عادتها و إلا ردت إلى أيام عادتها . (إلی قوله) و في الهداية الأخذ بقول أبي يوسف أيسر . اهـ و كثير من المتأخرين أفتوا به ؛ لأنه أسهل على المفتي و المستفتي سراج ، و هو الأولى فتح ، و هو قول أبي حنيفة الآخر نهاية . (1/ 290)۔