سرکاری انجنئیر کا کمیشن کے نام پر ٹھیکداروں سے رقم لینا جائز ہے؟

مفتی صاحب میری گزارش یہ ہے کہ میں سب انجینئر سول گورنمنٹ جاب کرتا ہوں، اور میری ڈیوٹی کا وقت سات بجے سے تین بجے تک ہوتا ہے، میری ڈیوٹی میں بلڈنگ انسپیکشن اور بلڈنگ پر کام کرنے والے ٹھیکدار کے کام کی نگرانی اور چیکنگ ہے، اس دوران میں بلڈنگ کی تعمیر پر خرچ ہونے والی رقم کابل بھی بنتاہے، جس کی بنیاد پر ٹھیکدار کو رقم کی ادائیگی گورنمنٹ کرتی ہے، بلڈنگ مکمل ہونے کے بعد .
میرا سوال یہ ہے کہ میں اس بلڈنگ کا بل اپنی ڈیوٹی کے اوقات کے بعد کمپلیٹ کرتا ہوں، کیونکہ ڈیوٹی کے وقت پر مجھے وقت نہیں ملتا، اوراس بل بنانے پر مجھ جیسے سب انجینئر زٹھیکداروں سے پوری اماؤنٹ (رقم) کا ایک پرسنٹ کمیشن کے نام پر وصول کرتے ہیں، میرے سارے دوست مجھے بھی ترغیب دیتے ہیں کہ یہ حلال ہے، کیونکہ ہم ٹھیکداروں کے بل والا کام ڈیوٹی کے وقت کے علاوہ میں کرتے ہیں، اوراس میں ہمارا بہت سارا اضافی وقت اور محنت لگتی ہے، جس کا گورنمنٹ ہمیں کچھ فائدہ نہیں دیتی، لہذا ہمارا ایک پرسنٹ کمیشن حلال ہے، حضرت صاحب میرے اور میرے جیسے باقی سب انجینئرز کی رہنمائی کریں، کہ بلڈنگ کابل بنانے کے بعد کیا ہم ٹھیکدار سے کسی قسم کی رقم کا تقاضا کرسکتے ہیں؟ اور یہ رقم اسلامی شریعت کی رو سے حلال ہے یا حرام؟

الجوابُ حامِدا ًو مُصلیِّا ً

صورتِ مسئولہ میں اخراجات کابل بنانا سائل اور اس جیسے دوسرے سب انجینئرز کی چونکہ بنیادی ذمہ داری ہے، جس پر وہ باقاعدہ گورنمنٹ سے تنخواہ وصول کرتے ہیں، اس لئے اپنے ذمہ واجب کام پر سرکار سے تنخواہ لینے کے باوجود کیمیشن کے نام پر ٹھیکداروں سے مزید رقم لینا رشوت کے زمرے میں آتا ہے، جو کہ شرعاً ناجائز وحرام ہے، جس سے احتراز لازم ہے۔

مأخَذُ الفَتوی

کما فی سنن أبی داود: حدثنا أحمد بن يونس، حدثنا ابن أبي ذئب، عن الحارث بن عبد الرحمن، عن أبي سلمة، عن عبد الله بن عمرو، قال: «لعن رسول الله صلى الله عليه وسلم الراشي والمرتشي» (3/300 رقم الحدیث 3580)۔
وفی الترغیب والترھیب: عب عبداللہ بن عمرو رضی اللہ تعالی عنہما عن النبی صلی اللہ علیہ وسلم قال: الراشی والمرتشی فی النار (راواہ الطبرانی) (3/180)۔
وفی الدرالمختار: (والثاني) وهو الأجير (الخاص) ويسمى أجير وحد (وهو من يعمل لواحد عملا مؤقتا بالتخصيص ويستحق الأجر بتسليم نفسه في المدة وإن لم يعمل الخ (6/69)۔