عورتوں کی ماہواری(حیض)کی عادت بگڑنے کی صورت میں ابتدائی و انتہائی حدود کا بیان

میرا سوال حیض کے متعلق ہے ، مسئلہ یہ ہے کہ شروع شروع میں کپڑوں پر صرف داغ دھبے لگتے ہیں اور پھر ایام کے گزرنے کے ساتھ ساتھ آہستہ آہستہ خون جاری ہوتا ہے اور اس طرح پندرہ بیس دن گزرجاتے ہیں، اب سوال یہ ہے کہ عورت کے کتنے دن حیض کے ہوں گے اور کس دن سے حیض شمار کیا جائے گا؟ جبکہ تین چار مہینے پہلے عادت چھ سات دن تھی۔
دوسرا مسئلہ یہ ہے کہ کیا حیض سے پاکی کے بعد غسل کرنے سے پہلے ، میاں بیوی جنسی تعلق قائم کرسکتے ہیں کہ نہیں؟

الجوابُ حامِدا ًو مُصلیِّا ً

سائلہ جس دن سے خون کے داغ دھبے دیکھے اس دن سے اپنے کو حائضہ شمار کرے ، پھر اگر عادت پوری ہونے کے بعد دس دن تک یہ خون جاری رہا تو پورے دس دن حیض شمار ہوں گے، جبکہ دس دن کے بعد بھی اگر خون جاری رہا تو ایسی صورت میں وہ خون استحاضہ (بیماری) کا سمجھا جائے گا، اور سابقہ عادت کے مطابق ، چھ یا سات دن حیض کے شمار ہونگے ۔
لہٰذا دس دن پورے ہونے تک نماز وغیرہ موقوف کرے اور اس کے بعد غسل کرکے نمازیں وغیرہ شروع کرے اور تین یا چار دنوں کی نمازیں لوٹاۓ ۔
جبکہ صورتِ مسئولہ میں اگر حیض پورے دس دن پر جاکر بند ہوجائے تو اس صورت میں سائلہ کا خاوند اس کے ساتھ غسل سے قبل بھی ہمبستری کرسکتا ہے۔

مأخَذُ الفَتوی

اخرج عبد الرزاق عن الثور فی المرأة تكون حیضتها ستة ایام ثم تحیض یومین ثم تطهر ، قال تغتسل و تصلی فان رأت الحیض بعد ذالك أمسك حتی تطهر إلٰی عشرة ، فان زادت علی عشر فهی مستحاضة تقضی الأیام التی زادت علی قرئها . (مصنف عبد الرزاق كتاب الحیض باب اجل الحیض: ج۱، ص۳۰۰)۔
و فی الهدایة : و إن انقطع الدم لعشرة أیام حل وطیها قبل الغسل لان الحیض لا مزید له علی العشرة . (ج۱، ص۶۴)۔