میت کے مصنوعی دانت ، تدفین سے قبل الگ کرنے کا مسئلہ

محترم مفتی صاحب السلام علیکم! حال ہی میں حضرت حکیم الاسلام قاری محمد طیب قاسمی صاحب کے صاحب زادے حضرت مولانا محمد سالم قاسمی صاحب کے انتقال کی خبر ملی، ساتھ ہی حضرت کی زندگی کی کچھ تصاویر اور حالت، میت کی تصاویر Facebook پر گردش کرنے لگیں ، حضرت والا یقیناً عمر کے حساب سے ایک بزرگ شخص تھے ؟ انتقال سے پہلے کی تصاویر میں جو ظاہری وجاہت اور بشاشت چہرے پر تھی ، انتقال کے بعد دانت وغیرہ ہٹا لینے کی وجہ سے وہ بہت حد تک متاثر نظر آئی ، بہت سی بار جن حضرات کی پوری بتیسی مصنوعی ہو ، ان کا چہرہ با لکل ہی پچک جاتا ہے، سوشل میڈیا کا دور ہے ، بڑی شخصیات کی تصاویر چند لمحات میں دنیا بھر میں پھیل جاتی ہیں ، چونکہ دانت ویسے بھی ورثاء پھینک دیتے ہیں، ایک بے حیثیت چیز ہے جو بعد میں استعمال نہیں ہوتی، تو کیا اس صورت میں کچھ گنجائش ملتی ہے کہ ہم اپنے بزرگوں کے چہرے کی ہیئت بر قرار رکھنے کے لۓ دانت میت کے منہ میں ہی رہنے دیں کہ دیکھنے والوں کو اچانک اس تبدیلی کی وجہ سے چہرہ بدنما نہ لگے ؟ برائے مہربانی شریعتِ مطہرہ کی روشنی میں وضاحت فرمادیں ۔

الجوابُ حامِدا ًو مُصلیِّا ً

اگر میت کے مصنوعی دانت اس کے منہ میں اس طرح پیوست کیے گئے ہوں کہ ان کا نکالنا دقت اور دشواری کا باعث ہو ، جس سے میت کی بے حرمتی کا اندیشہ ہو تو ایسے مصنوعی دانتوں کا نکالنا جائز نہیں، البتہ اگر دانت مضبوطی کے ساتھ جڑے ہوئے نہ ہوں ، بلکہ بوقتِ ضرورت صفائی ستھرائی وغیرہ کے لیے بآسانی نکالے جاسکتے ہوں ،تو وفات کے بعد وہ دانت میت کے منہ سے نکال لینے چاہیۓ۔

مأخَذُ الفَتوی

في الدر المختار : (و لا يسرح شعره) أي يكره تحريما (و لا يقص ظفره) إلا المكسور اھ(2/ 197)۔
و في حاشية ابن عابدين : تحت (قوله : أي يكره تحريما) لما في القنية من أن التزيين بعد موتها و الامتشاط و قطع الشعر لا يجوز نهر اھ (2/ 198)۔