السلام علیکم۔ 3–4 سال پہلے، اپنے شوہر کے ساتھ ایک شدید بحث کے دوران میں نے کہا: ’’جاؤ، تم مجھ سے آزاد ہو۔‘‘ میں نے لفظ ’’طلاق‘‘ استعمال نہیں کیا، اور میرے شوہر نے بھی طلاق کے بارے میں کچھ نہیں کہا۔ میرا نکاح ختم کرنے کا بھی کوئی ارادہ نہیں تھا؛ میں نے یہ بات صرف غصے میں کہی تھی۔ کیا اس جملے کا ہمارے نکاح پر کوئی اثر ہے یا حنفی فقہ کے مطابق یہ طلاق شمار ہوگی؟
واضح ہو کہ شریعت نے طلاق کا اختیارمرد کو دیا ہے نہ کہ عورت کو ، لہذا صورت مسؤلہ میں اگر سائلہ کو شوہر کی جانب سے باقاعدہ طلاق کا حق تفویض نہ کیا گیا ہوتو ایسی صورت میں سائلہ کا اپنے شوہر کو مذکور الفاظ یعنی " جاؤ، تم مجھ سے آزاد ہو" کہنے سے کوئی طلاق واقع نہیں ہو گی ۔
کمافی حاشیۃ ابن عابدین: قال في الفتح: ومنها أي من محاسنه جعله بيد الرجال دون النساء لاختصاصهن بنقصان العقل وغلبة الهوى ونقصان الدين. ومنها شرعه ثلاثا لأن النفس كذوبة ربما تظهر عدم الحاجة إليها ثم يحصل الندم فشرع ثلاثا ليجرب نفسه أولا الخ( کتاب الطلاق ،ج:3 ص:229 ،ناشر:سعید)
وفی الدر المختار: (قال لها اختاري أو أمرك بيدك ينوي) تفويض (الطلاق) لانها كناية فلا يعملان بلا نية (أو طلقي نفسك فلها أن تطلق في مجلس علمها به) مشافهة أو إخبارا (وإن طال) يوما أو أكثر ما لم يوقته ويمضي الوقت الخ(باب تفویض الطلاق ص:216 ناشر:سعید)