تین طلاق

کیا فرماتے ہیں مفتیان کرام اس مسئلہ کے بارے میں کہ میری ساس نے مجھے تنگ کیا اور کہا کہ میری بیٹی کو طلاق دو میں مجبور ہوکر چلاگیا اور منسلکہ طلاق نامہ بنوایا اور اس میں مکمل تفصیل درج کروائی لیکن دل سے طلاق دینے پر مطئمن نہیں تھا اور نہ ہی اب نیت ہے ، اس سے پہلے میری بیوی بے ہوش تھی جب میں طلاق نامہ مکمل لکھوا چکا تو اسے ہوش آیا تو اس نے مجھے کال کی اور بلایا تو میں چلا گیا پھر ہماری صلح صفائی ہوگئی اس بات کو تقریباً دوسال ہوچکے ہیں اب معلوم یہ کرنا ہے کہ کیا یہ طلاق ہوچکی ہے ؟ اور اگر ہوچکی ہے تو کتنی طلاقیں ہوئی ہیں ؟اور اب اس کا کیا حکم ہے ؟

الجوابُ حامِدا ًو مُصلیِّا ً

واضح ہوکہ جس طرح زبانی طور پر طلاق دینے سے شرعاً طلاق واقع ہوجاتی ہے اسی طرح تحریری طور پر طلاق دینے سے بھی شرعاً طلاق واقع ہوجاتی ہے ، لہذا صورت مسئولہ میں جب سائل نے اپنی ساس کے مطالبہ پر منسلکہ طلاق نامہ بنوادیا ہے اگرچہ دل سے اطمینان نہ ہو تب بھی اس طلاق نامہ بنوانے کے ساتھ ہی اس کی بیوی پر طلاق نامہ میں درج تینوں طلاقیں واقع ہوکر حرمت مغلظہ ثابت ہوچکی تھی جس کے بعد بغیر حلالہ شرعیہ کے دونوں کا میاں بیوی کی حیثیت سے ایک ساتھ رہنا جائز نہیں ، اور اب تک ایک ساتھ رہنے کی وجہ سے دونوں گناہ گار ہوئے ہیں جس پر انہیں بصدق دل توبہ واستغفار اور فی الفور ایک دوسرے سے علیحدگی اختیار کرنا لازم ہے ۔
اور حلالہ شرعیہ یہ ہے کہ عورت ایّام عدت گزارنے کے بعد بغیر کسی شرط کے کسی دوسرےمسلمان سے اپنا عقد نکاح کرے ، چنانچہ اگر وہ دوسراشخص بھی اسے ایک مرتبہ ہمبستری ( جو کہ حلالہ شرعیہ کے تحقق کے لئے ضروری ہے ) کے فوراً بعد یا ازدواجی زندگی کے کچھ عرصہ بعد طلاق دیدے یا طلاق تو نہ دے ، مگر شوہر کا پہلے انتقال ہو جائے ، بہر صورت اس کی عدت گزارنے کے بعد اگر وہ پہلے شوہر کے عقد نکاح میں آنا چاہے اور پہلا شوہر بھی اسے رکھنے پر رضا مند ہو تو نئے مہر کے تقرر کے ساتھ گواہوں کی موجودگی میں دوبارہ عقد نکاح کرکے باہم میاں بیوی کی حیثیت سے زندگی بسر کر سکتے ہیں ، تاہم حلالہ اس شرط کے ساتھ کرنا کہ زوج ثانی ہمبستری کے بعد بیوی کو طلاق دیگا ، تاکہ وہ زوج اول کے لئے دوبارہ حلال ہوجائے ، مکروہ تحریمی ہے اور اس پر احادیثِ مبارکہ میں وعیدیں وارد ہوئی ہیں، لہذا اس سے احتراز لازم ہے ، البتہ بلا شرط ایسا کرنا بلا شبہ جائز اور درست ہے۔

مأخَذُ الفَتوی

کمافی الشامیۃ:ولو استكتب من آخر كتابا بطلاقها وقرأه على الزوج فأخذه الزوج وختمه وعنونه وبعث به إليها فأتاها وقع إن أقر الزوج أنه كتابة الخ. (ج3 ص: 246 مطلب فی الطلاق باالکتابۃ ط: سعید )
وفی بدائع الصنائع : وأما الطلقات الثلاث فحكمها الأصلي هو زوال الملك، وزوال حل المحلية أيضا حتى لا يجوز له نكاحها قبل التزوج بزوج آخر؛ لقوله - عز وجل - {فإن طلقها فلا تحل له من بعد حتى تنكح زوجا غيره}.(ج3 ص 187 فصل فی حکم الطلاق البائن ط: سعید )
وفی الھندیۃ : وإن كان الطلاق ثلاثا في الحرة وثنتين في الأمة لم تحل له حتى تنكح زوجا غيره نكاحا صحيحا ويدخل بها ثم يطلقها أو يموت عنها كذا في الهداية .(ج1 ص:473 الباب السادس فی الرجعۃ وفیما تحل بہ المطلقۃ وما یتصل بہ،فصل فیما تحل بہ المطلقۃ وما یتصل بہ ط: رشیدیہ)