”میری طرف سے ہوگئی ہے “ کہنے سے طلاق کا حکم

میرے ہسبینڈ نے 4 ماہ پہلے مجھے ٹیکسٹ میسج کیا تھا کہ ”میں تمہیں آزاد کرنا چاہتا ہوں“۔ پھر گھر میں بہت لڑائی ہوئی۔ اس کے بعد ابھی 1 ماہ پہلے اپنی سسٹر کو وائس میسج کیا جس میں طلاق کا بولا ہوا تھا اور اپنی سسٹر سے کہا کہ جاؤ بھابھی کو سنا دو۔ اُس نے مجھے نہیں سنوایا اور میسج ڈیلیٹ کر دیا۔ مجھے نہیں پتا اُس وائس میسج میں کیا الفاظ تھے۔ اُس کے بعد 5 دن بعد کال پر اوپن وائس تھی، میں نے اتنا سنا تھا ”میری طرف سے ہو گئی“۔ بعد میں وہ اپنی امی کو بار بار کال پر پوچھ رہے تھے کہ ”میرا، میں نے وہ وائس میسج سنا تو نہیں؟“۔پلیز میری رہنمائی فرمائیں، کیا مجھے ڈائیورس ہو گئی ہے؟کال پر طلاق کا واضح لفظ نہیں بولا گیا تھا، بس اتنا کہا تھا ”میری طرف سے ہو گئی“ اور وہ بھی مجھے نہیں بلکہ اپنی فیملی کو کہہ رہے تھے۔ اب اس بات کو 30 دن ہو گئے ہیں اور اس بارے میں کوئی بات نہیں ہوئی۔ میرے ہسبینڈ مجھ سے پچھلے 4 ماہ سے بات بھی نہیں کر رہے۔

الجوابُ حامِدا ًو مُصلیِّا ً

صورتِ مسئولہ میں جب سائلہ کو اس بات کا یقین ہے کہ اس کے شوہر نے اپنی بہن کو ایسا میسج کیا تھا جس میں اس نے طلاق کے الفاظ بولے تھے، اور اس کی بہن نے وہ میسج ڈیلیٹ کر دیا ہےجبکہ شوہر بھی چند ماہ سے رابطے میں نہیں ہے تو اس پر لازم ہے کہ وہ اپنے کو مطلقہ سمجھے اور خاندان کو بڑوں یا محلے کی سطح پر یونین کونسل کے ذریعہ شوہر اور اس کی بہن سے وضاحت طلب کرے کہ اس میسج میں کتنی طلاقوں کا ذکر تھا؟نیز اس کے الفاظ کیا تھے؟تاکہ مستقبل میں اس کےاور اس کے شوہر کیلئے شرعی احکامات کایقینی تعین ہو سکے۔جب تک یہ وضاحت سامنے نہیں آتی سائلہ اس کے پاس نہ جائے اور نہ ہی اسے اپنے قریب آنے دے۔

مأخَذُ الفَتوی

و فی رد المحتارتحت (قوله دين فقط)۔۔۔۔والمرأة كالقاضي إذا سمعته أو أخبرها عدل لا يحل له تمكينه. والفتوى على أنه ليس لها قتله، ولا تقتل نفسها بل تفدي نفسها بمال أو تهرب الخ(باب صریح الطلاق ج:3 ص:251 ط: سعید)۔