گھر والوں کے بہکاوے میں آکر دی ہوئی طلاق کا حکم

مسمی فرحان ولد اسلم ! میری شادی بشرہ ولد اختر سے ہوئی تھی، شادی کو ڈیڑھ سال ہو گئے ،ایک دن میرے گھر میں ،گھر والوں سے میری بیوی کی لڑائی ہوئی تھی ،میرے ساتھ نہیں تھی، لڑائی بہت بڑھ گئی تھی، میں نے بیوی کو اس کی بہن کے گھر بھیج دیا تھا ،میرے گھر والوں نے مجھے بول رکھا تھا کہ ہم تیری طلاق کر وائیں گئے ،میرے سامنے 10 غلط بات بولی بیوی کے خلاف اور بولا طلاق دے دو، تین دن تک بولتے رہے، میں نے کورٹ کے ذریعے تحریری تین طلاق کے نوٹس بھیج دیے ہیں ،کچھ دن کے بعد لوگوں سے پوچھا انہوں نے بتایا طلاق ہو گئی ،گھر والے بول رہے تھے ہو گئی طلاق ،اب اس لڑکی سے بات نہیں کرنا ،وہ عدت میں ہے جب عدت میں تھی مجھے اور غلط بات بتائی میری بیوی کے خلاف ، مجھے اب راستہ بتایا جائےکہ کیا کیا جائے ؟
میری بیوی اور میں ایک ہونا چاہتے ہیں ،صحیح راستہ نکلنا چاہیے۔شکریہ

الجوابُ حامِدا ًو مُصلیِّا ً

صورت مسؤلہ میں سائل نے اگرچہ گھر والوں کے دباؤ میں آکر مذکور طلاق نامہ بنوایا ہے اس کے باوجود منسلکہ طلاق نامہ بنواکر اس پر دستخط کردینے سے اس کی بیوی پر تینوں طلاقیں واقع ہو کر حرمت مغلظہ ثابت ہو چکی ہے، اب رجوع نہیں ہو سکتا اور حلالہ شرعیہ کے بغیر باہم عقد نکاح بھی نہیں ہوسکتا، اور حلالہ شرعیہ یہ ہے کہ عورت اپنے شوہر سے علیحدگی اور عدت کے بعد بغیرکسی شرط کے کسی دوسرے مسلمان شخص سے اپناعقد نکاح کرے،چنانچہ اگروہ دوسراشخص بھی ایک مرتبہ ہمبستری (جوکہ حلالہ شرعیہ کے تحقق کے لئے ضروری ہے)کے فوراً بعد یا ازدواجی زندگی کے کچھ عرصہ بعد طلاق دیدے یا طلاق تو نہ دے مگر بیوی سے پہلے اس کا انتقال ہوجائے۔بہرصورت اس کی عدت گزرنے کے بعد وہ پہلے شوہر کے عقدنکاح میں آناچاہے اور پہلاشوہربھی اسے رکھنے پر رضامندہوتو نئے مہرکیساتھ گواہوں کی موجودگی دوبارہ عقدنکاح کرکے باہم میاں بیوی کی حیثیت سے زندگی بسرکرسکتے ہیں۔تاہم حلالہ اس شرط کے ساتھ کرناکہ زوج ثانی ہمبستری کے بعدبیوی کو طلاق دےگا،تاکہ زوج اول دوبارہ اس کے ساتھ عقدنکاح کرے،یہ مکروہ تحریمی ہے،اور اس پر حدیث شریف میں وعید بھی وارد ہوئی ہے،اس لئے اس سے احتراز لازم ہے۔جبکہ بلاشرط بلاشبہ جائز اور درست ہے۔

مأخَذُ الفَتوی

کما في صحيح البخاري : عن عائشة قالت : جاءت امرأة رفاعة القرظي إلى رسول الله صلى الله عليه و سلم فقالت : إني كنت عند رفاعة فطلقني فبت طلاقي فتزوجت بعده عبد الرحمن بن الزبير وما معه إلا مثل هدبة الثوب فقال : " أتريدين أن ترجعي إلى رفاعة ؟ " قالت : نعم قال : " لا حتى تذوقي عسيلته ويذوق عسيلتك۔" ويذوق عسيلتك اھ (ج ٢ ص ١٢٤٣ ، باب شهادۃ المختبی، ط: البشرى)۔
وفی رد المحتار: تحت (قوله طلقت بوصول الكتابة ) أي اليها ( إلى قوله) ولو استكتب من آخر كتاباً بطلاقها وقرأه على الزوج فأخذه الزوج وختمه و عنونه وبعث به إليها فاناها وقع الخ ( ج ٣ ص 246 ط: سعید)۔
وفي الهداية : وإن كان الطلاق ثلاثا فى الحرة ،أو ثنتين في الأمة لم تحل له حتى تنكح زوجا غيره نكاحاً صحيحاً ويدخل بها ثم يطلقها أو يموت عنها الخ (ج۲ ص ۹۲ ط: انعامية)