کیا حضور صلی اللہ علیہ و سلم مختار کل ہیں ؟

السلام علیکم! میں آپ سے یہ سوال پوچھنا چاہتا ہوں کہ کیا حضرت محمد ﷺ ’’مختارِ کل‘‘ ہیں؟ اور کیا وہ شریعت میں اپنی مرضی سے تبدیلی کرسکتے تھے؟ جیسا کہ حضرت محمد ﷺ نے حضرت حمزہؓ کا نکاح بغیر حقِ مہر کے کروایا تھا، جبکہ قرآن کریم میں حق مہر ادا کرنا لازمی ہے، اگرچہ یہ الگ بات ہے کہ بیوی معاف کردے، حق مہر کا مختص کرنا فرض ہے، لیکن حضرت محمد ﷺ نے بغیر حق مہر کے نکاح پڑھوایا تھا، اس سے ظاہر ہوتا ہے کہ ان کے پاس ہر چیز کا اختیار ہے؟
اگر نہیں ہے تو انہوں نے خلافِ شریعت نکاح کیسے پڑھادیا؟ براہ مہربانی تفصیلی جواب دیں، مہربانی ہوگی۔

الجوابُ حامِدا ًو مُصلیِّا ً

بعض وہ احکام جو ’’قرآنِ کریم‘‘ میں مذکوریا مفصل نہیں، ان احکام کو نبیﷺ وحی خفی کے ذریعہ حکمِ خداوندی سے بیان فرماتے ہیں،یہ باختیارِ خداوندی ہوتا تھا نہ کہ اپنی ذاتی رائے اور چاہت سے، اس لیے اس کو بنیاد بناکر آپ ﷺ کو مختارِ کل قرار دینا ناسمجھی کی بات ہے، جبکہ حضرت حمزہؓ کے نکاح کا معاملہ اور مذکور تفصیل باوجود تلاش کے کسی حدیث کی کتاب سے نہیں مل سکی، اس لیے اگر سائل اس سلسلہ میں مذکور حدیث کی پوری تفصیل لکھ کر بھیج دے تو اس پر بھی غور کیا جاسکتا ہے۔

مأخَذُ الفَتوی

في تفسیر ابن کثیر : ولهذا قال: ﴿وما ينطق عن الهوى﴾ أي: ما يقول قولا عن هوى وغرض، ﴿إن هو إلا وحي يوحى﴾ أي: إنما يقول ما أمر به، يبلغه إلى الناس كاملا موفرا من غير زيادة ولا نقصان، كما رواه الإمام أحمد (ٳلی قوله) عن أبي هريرة، عن النبي صلى الله عليه وسلم قال: "ما أخبرتكم أنه الذي من عند الله، فهو الذي لا شك فيه" اھـ (۴/۳۱۴)۔
وقال اللہ تعالیٰ: ﴿وَمَا يَنْطِقُ عَنِ الْهَوَى (3) إِنْ هُوَ إِلَّا وَحْيٌ يُوحَى﴾ [النجم: 3، 4]
وقال اللہ تعالیٰ: ﴿قُلْ لَا أَمْلِكُ لِنَفْسِي نَفْعًا وَلَا ضَرًّا إِلَّا مَا شَاءَ اللَّهُ وَلَوْ كُنْتُ أَعْلَمُ الْغَيْبَ لَاسْتَكْثَرْتُ مِنَ الْخَيْرِ وَمَا مَسَّنِيَ السُّوءُ إِنْ أَنَا إِلَّا نَذِيرٌ وَبَشِيرٌ لِقَوْمٍ يُؤْمِنُونَ ﴾ [الأعراف: 188] واللہ أعلم بالصواب!