دوسری بیوی کو دکھانے اور مطمئن کرنے کی غرض تحریری طلاق نامہ سے طلاق کاحکم

کیا فرماتے ہیں علماء کرا م مندرجہ ذیل مسئلہ کے بارے میں کہ میر ے شوہر مسمی......نے تحریری طور پر تین طلاقیں دیں ” کہ میں تمہیں طلاق دیتا ہوں “ اب وہ کہتاہے کہ یہ تحریر ی طلاق نامہ ،میں نے دوسری بیوی کو دکھانے کے لئے ویسے ہی بنا یا تھا ، اب معلو م یہ کرنا ہے کہ اس صورت میں کتنی طلاقیں واقع ہوئیں اور اب ہمارے لئے کیا حکم ہے؟

الجوابُ حامِدا ًو مُصلیِّا ً

سوال کےساتھ منسلکہ طلاق نامہ اگر مطابقِ اصل ہو اور شوہر نے اپنی مرضی سے ( اگر چہ دوسری بیوی کو اطمینان دلانے کے لئے ہو) بنواکر اس پر دستخط کردئے ہوں تو اس سے سائلہ پر تینوں طلاقیں واقع ہوکر حرمتِ مغلظہ ہوچکی ہیں ، اب رجوع نہیں ہو سکتا ، اس لئے دونوں پر لازم ہے کہ فوراً ایک دوسرے سے علیحدگی اختیار کریں ، جبکہ عورت ایام عدت گزارنے کے بعد دوسری جگہ نکاح کرنے میں آزاد ہوگی ۔

مأخَذُ الفَتوی

کما فی الدّر المختار: کتب الطّلاق ان مستبیناً علیٰ نحو لوح وقع ان نویٰ و قیل مطلقاً الخ
و فی الرّد تحت( قولہ: کتب الطلاق الخ) قال فی الھندیّۃ: الکتابۃ علی نوعین مرسومۃ او غیر مرسومۃ ( الیٰ قولہ) و ان کانت مرسومۃ یقع الطلاق نویٰ او لم ینو الخ( کتاب الطلاق، مطلب فی الطلاق بالکتابۃ، ج 1، ص 246، ط: ایچ ایم سعید)-
و فی الھنّدیّۃ: و فیہ ایضاً رجل استکتب من رجل آخر الی امرأتہ کتاباً بطلاقھا و قرأہ علی الزّوج فأخذہ و طواہ و ختم و کتب فی عنوانہ ابعث بہ الی امرأتہ فأتاھا الکتٰب و أقرّ الزّوج أنّہ کتابہ فانّ الطلاق تقع علیھا الخ( کتاب الطّلاق، الفصل السادس فی الطلاق بالکتابۃ، ج 1، ص: 379، ط: ماجدیۃ) و اللہ اعلم