میرے شوہر نے مجھے ایک طلاق 2014 میں دی تھی، دوسری ایک ماہ پہلے دی، اور ساتھ ہی یہ کہا کہ میں دوسری طلاق کل دوں گا اور تیسری پرسوں دوں گا، کیونکہ وہ بھول گئے تھے کہ انہوں نے مجھے ایک طلاق پہلے ہی دی ہوئی ہے۔ یہ پوچھنا تھا کہ ہماری طلاق ہو چکی ہے یا نہیں؟
سائلہ کا بیان اگر واقعۃً درست اور مبنی بر حقیقت ہو ،اور اس میں کسی بھی قسم کی غلط بیانی اور دروغ گوئی سے کام نہ لیا گیا ہو اور واقعۃً سائلہ کے شوہرنے اپنی بیوی کو صریح الفاظ کے ساتھ 2014 ءمیں ایک طلاق دی ہو اور اس کے بعد دورانِ عدت رجوع کر لیا ہو تو دونوں کا نکاح بدستور برقرار تھا، لیکن حالیہ واقعہ میں جب ایک مہینہ قبل دوسری طلاق بھی صریح الفاظ میں دے دی تو اس سے سائلہ پر دوسری طلاق بھی واقع ہو چکی ہے۔
جبکہ شوہر کا مذکور جملہ”میں دوسری طلاق کل دوں گا اور تیسری طلاق پرسوں دوں گا“ چونکہ مستقبل کے صیغہ پر مشتمل ہے، اس لئے اس قول سے شرعاً کوئی طلاق واقع نہیں ہوئی،البتہ شوہر کو دورانِ عدت رجوع کا حق حاصل ہے، چنانچہ اگر شوہر زبانی طور رجوع کر لے، مثلاً کہدے کہ میں رجوع کرتا ہوں، وغیرہ یا عملاً میاں بیوی والا تعلق قائم کر لیں یا شہوت کے ساتھ بیوی کو چھولےتو اس سے بھی رجوع درست ہو کر دونوں کا نکاح برقرار رہے گا ، ورنہ دورانِ عدت رجوع نہ کرنے کی صورت میں عدت گزرنے پر دونوں کا نکاح بالکلیہ ختم ہو جائے گا اور سائلہ دوسری جگہ نکاح کرنے میں آزاد ہوگی، اس کے بعد ساتھ رہنے کے لیے باقاعدہ شرعی گوا ہان کی موجودگی میں نئے حقِ مہر کےتقرر کے ساتھ ایجاب و قبول کرتے ہوئے تجدیدِ نکاح لازم ہوگا، بہردوصورت آئندہ کے لیے شوہر کو فقط ایک طلاق کا اختیار حاصل ہے ،لہذا آئندہ طلاق کےمعاملہ میں خوب احتیاط لا زم ہے۔