میرا ایک ہفتہ پہلے اپنی بیوی سے واٹس ایپ پر جھگڑا ہوگیا تھا، مجھے بہت شدید غصہ آگیا تھا اور میں نے غصے میں طلاق کہہ دیا، لڑائی چلتی رہی اور تھوڑی دیر بعد میں نے غصے میں پھر طلاق کہہ دیا، وہ مجھے اکساتی رہی کہ ہمت ہے تو سامنے آکر دو واٹس ایپ پر طلاق نہیں ہوتی، میں غصے میں پھر طلاق کہہ دیا، مجھے بالکل اس بات کا علم نہیں تھا کہ اب رجوع نہیں ہوسکے گا، میرا بالکل ایسا ارادہ نہیں تھا، نہ میری بیوی چاہتی ہے کہ طلاق ہو نہ میں چاہتا ہوں، ہماری ایک سال کی بیٹی ہے، ہمارے بیچ فوراً صلح ہوگئی تھی، ہم بہت پریشان ہیں اس پر، آگے کیا ہوگا۔
(نوٹ) الفاظ طلاق یہ تھے "میں تمہیں طلاق دیتا ہوں، میں تمہیں طلاق دیتا ہوں الف ناصر جبکہ ان کا نام الف ہاشمی اور والد کا پورا نام نون ہاشمی ہے ،میری طرف سے طلاق ہے تمہیں" ، اب معلوم یہ کرنا ہے کہ اس صورت میں کتنی طلاقیں واقع ہوئیں؟ اور اب ہمارے لیے کیا حکم ہے؟
واضح ہو کہ جس طرح زبانی طور پر طلاق کے الفاظ کہنے سے واقع ہوتی ہےایسا ہی تحریری طور پر طلاق دینے یا واٹس ایپ وغیرہ پر طلاق کے الفاظ بیوی کو ارسال کرنے سے بھی طلاق واقع ہوجاتی ہے، لہٰذا صورت مسئولہ میں سائل نے اگر چہ الف ہاشمی کے بجائے الف ناصر کہہ کر بیوی کو طلاق دی ہو تب بھی شرعاً سائل کی بیوی پر تینوں طلاقیں واقع ہو کر حرمتِ مغلظہ ثابت ہو چکی ہے ، اب رجوع نہیں ہو سکتا اور حلالۂ شرعیہ کے بغیر باہم عقدِ نکاح بھی نہیں ہوسکتا، لہٰذا دونوں پر لازم ہے کہ فوراً ایک دوسرے سے علیحدگی اختیار کریں اور میاں بیوی والے تعلقات ہرگز قائم نہ کریں ورنہ دونوں سخت گناہ گار ہوں گے، جبکہ عورت ایامِ عدت گزارنے کے بعد اپنی مرضی سے دوسری جگہ نکاح کرنے میں بھی آزاد ہوگی۔
اور حلالۂ شرعیہ یہ ہے کہ عورت ایامِ عدت گزارنے کے بعد بغیر کسی شرط کے کسی مسلمان سے اپنا عقدِ نکاح کرے، چنانچہ اگر وہ دوسرا شخص بھی اسے ایک مرتبہ ہمبستری (جو کہ حلالۂ شرعیہ کے تحقق کے لئے ضروری ہے) کے فوراً بعد یا ازدواجی زندگی کے کچھ عرصہ بعد طلاق دیدے یا طلاق تو نہ دے، مگر اس کا پہلے انتقال ہو جائے ، تو بہرصورت اس کی عدت گزارنے کے بعد اگر وہ پہلے شوہر کے عقدِ نکاح میں آنا چاہے اور پہلا شوہر بھی اسے رکھنے پر رضا مند ہو تو نئے مہر کے تقرر کے ساتھ گواہوں کی موجودگی میں دوبارہ عقدِ نکاح کر کے باہم میاں بیوی کی حیثیت سے زندگی بسر کر سکتے ہیں، تاہم حلالہ اس شرط کے ساتھ کرنا کہ زوجِ ثانی ہمبستری کے بعد بیوی کو طلاق دیگا، تاکہ زوجِ اول کے لئے عورت دوبارہ حلال ہوجائے، مکروہِ تحریمی ہے، اور احادیثِ مبارکہ میں اس پر وعیدیں وارد ہوئی ہیں، لہذا اس سے احتراز لازم ہے ، البتہ بلا شرط ایسا کرنا بلا شبہ جائز اور درست ہے ۔