شوہر کی طرف سے مختلف اوقات میں دی ہوئی طلاقوں کا حکم

السلام علیکم ورحمۃ اللہ وبرکاتہ! مسئلہ یہ ہیکہ ہمارے گھریلو جھگڑے کافی عرصہ سے چل رہے ہیں ، تقریبا چھ ماہ قبل لڑائی کے دوران میں نے اپنی بیوی کو ایک طلاق دی ، پھر رجوع کرلیا ، گزشتہ چھ ماہ میں چار سے پانچ بار میں طلاق دے کر رجوع کر چکا ہوں ، الفاظ طلاق یہ تھے " تا تہ طلاق دے " تجھے طلاق ہے ، اس کے بعد عدت میں ہی رجوع کیا ، پھر کچھ عرصہ بعد یہی الفاظ کہے اور پھر رجوع کیا ، اس طرح چار سے پانچ مرتبہ یہی الفاظ کہہ کر عدت کے دوران رجوع کرتا رہا۔
(2) اگر طلاق واقع ہوئی ہے تو شریعت کے مطابق حق مہر کو واضح کر دیں ، اگر وہ دولاکھ ( 85) پچاسی ہزار کا سامان مانگےتو وہ واپس کرنا پڑیگا یا نہیں ؟ اور آدھا تولہ سونا بھی والد نے بیوی کو دیا تھا ، والد اس کا بھی مطالبہ کرتا ہے ،یہ میں نے واپس کرنا ہے یا نہیں ؟ اور شوہر نے تین تولہ سونا بنا یا ، اورشوہر نے اس کو فروخت کردیا ، اب بیوی اس کا مطالبہ کرتی ہے، اس کے بارے میں شریعت کیا کہتی ہے ، وہ واپس کرنا ہے یا نہیں ؟
(3) ان کا ایک بیٹا اور ایک بیٹی ہے ، بیٹے کی عمر (6) ماہ اور بیٹی کی عمر (3) سال ہے ، اس کے بارے میں شریعت خرچ کے لحاظ سے کیا کہتی ہے ؟ لہذا شریعت کی روشنی میں میری رہنمائی فرمائیں، شکریہ۔

الجوابُ حامِدا ًو مُصلیِّا ً

سائل نے وقتاً فوقتاً دو صریح طلاقیں دیکر دورانِ عدت رجوع کرلیا تھا تو اس سے نکاح بدستور برقرار تھا، البتہ تیسری مرتبہ جب الفاظ طلاق کہہ دیے تو اس سے سائل کی بیوی پر تیسری طلاق واقع ہوئی اور حرمت مغلظہ ثابت ہو کر دونوں کا نکاح ختم ہوچکا تھا ، جبکہ مزید طلاقیں محل نہ ہونیکی وجہ سے لغو ہوچکی ہیں ، اب رجوع نہیں ہوسکتا اور حلالۂ شرعیہ کے بغیر باہم عقدِ نکاح بھی نہیں ہوسکتا ، لہذا دونوں پر لازم ہے کہ فوراً ایک دوسرے سے علیحدگی اختیار کریں اور میاں بیوی والے تعلقات ہر گز قائم نہ کریں ، ورنہ دونوں سخت گناہ گار ہوں گے، اور اب تک ایک ساتھ رہنے کی وجہ سے جو گناہ سرزد ہوا ہے ، اس پر بصدقِ دل توبہ واستغفار کریں ، اور آئندہ دوبارہ اس قسم کے ناجائز کاموں سے مکمل اجتناب کریں ، جبکہ عورت عدت کے بعد دوسری جگہ نکاح کرنے میں بھی آزاد ہے ، جہاں تک حق مہر اور جہیزکے مطالبہ کا تعلق ہے ، تو اگر سائل نے ابھی تک حق مہر ادا نہ کیا ہو تو اس کی ادائیگی اس پر لازم ہے ، جبکہ جہیز میں جو سامان والدین کی طرف سے عورت کو دیا گیا ہو تو وہ اس کی مالک ہے ، لہذا وہ اپنے مطالبہ میں حق بجانب ہے ، البتہ جو تین تولہ سونا سائل نے اپنی بیوی کو بنا کر دیا تھا تو اگر یہ حق مہر کے طور پر تھا یا ہبہ کر دیا تھا اور اس کی اجازت کے بغیر فروخت کردیاتھا ، تو اس کی ادائیگی بھی سائل پر لازم ہے ، جبکہ لڑکے کی عمر سات سال اور لڑکی کی عمر نو سال مکمل ہونے تک وہ اپنی والدہ کی پرورش میں ہونگے ، بشرطیکہ اس دوران عورت ان بچوں کے کسی غیر ذی رحم سے نکاح نہ کرلے ، البتہ مذکور مدت کے بعد سائل ان بچوں کو اپنی تحویل میں لے سکتا ہے ، جبکہ دورانِ پرورش ان بچوں کے اخراجات سائل پر لازم ہوں گے۔

مأخَذُ الفَتوی

کمافی الدرالمختار: (وإن فرق) بوصف أو خبر أو جمل بعطف أو غيره (بانت بالأولى) لا إلى عدة (و) لذا (لم تقع الثانية) بخلاف الموطوءة حيث يقع الكل وعم التفريق،الخ ( ج3 ص 286 باب الطلاق غیر المدخول بہا ط سعید)۔
وفی بدائع الصنائع: وأما الطلقات الثلاث فحكمها الأصلي هو زوال الملك، وزوال حل المحلية أيضا حتى لا يجوز له نكاحها قبل التزوج بزوج آخر؛ لقوله - عز وجل - {فإن طلقها فلا تحل له من بعد حتى تنكح زوجا غيره} [البقرة: 230] ، وسواء طلقها ثلاثا متفرقا أو جملة واحدة؛الخ ( ج3 ص 187 فصل واما حکم البائن ط سعید)۔
وفی الدر المختار: (والحاضنة) أما، أو غيرها (أحق به) أي بالغلام حتى يستغني عن النساء وقدر بسبع وبه يفتى لأنه الغالب.(الی قولہ) (أحق بها) بالصغيرة (حتى تحيض) أي تبلغ في ظاهر الروايةالخ ( ج3 ص 566 باب الحضانۃ ط سعید)۔
وفی الھندیۃ: نفقة الأولاد الصغار على الأب لا يشاركه فيها أحد(الی قولہ) فإن أبى أن يكتسب وينفق عليهم يجبر على ذلك،( الی قولہ) الذكور من الأولاد إذا بلغوا حد الكسب، ولم يبلغوا في أنفسهم يدفعهم الأب إلى عمل ليكسبوا، أو يؤاجرهم وينفق عليهم من أجرتهم وكسبهم، وأما الإناث فليس للأب أن يؤاجرهن في عمل، أو خدمة كذا في الخلاصة الخ ( ج 1 ص 562 الفصل الرابع فی نفقۃ الاولادط ماجدیۃ)۔
وفی بدائع الصنائع: وإذا طالبت المرأة بالمهر يجب على الزوج تسليمه أولا؛ لأن حق الزوج في المرأة متعين، وحق المرأة في المهر لم يتعين بالعقد، وإنما يتعين بالقبض فوجب على الزوج التسليم عند المطالبة ليتعين كما في البيع الخ ( ج2ص 288 کتاب النکاح فصل وأما بیان مایجب بہ المھر، ط سعید)۔
وفی الھدایۃ: وإذا خلا الرجل بإمراتہ ولیس ھناک مانع من الوطء ثم طلقھا فلھا کمال المھر الخ ( ج3 ص 52 کتاب النکاح باب المھر)۔